Սպանդանոցային մորթի պարտադիր պահանջը կնպաստի տավարի մսի թանկացմանը․ Հրաչ Բերբերյան

Այս տարվա  հունիսին պարենային ապրանքների համաշխարհային գները տարեսկզբից ի վեր առաջին անգամ աճ են գրանցել՝ կազմելով 93,2 կետ, ինչը 2,4 տոկոսով  բարձր է մայիսին ստացված տվյալներից։  Հուլիսի 2-ին ՄԱԿ-ի Պարենի և գյուղատնտեսության կազմակերպությունը ներկայացրել է պարենային ապրանքների հունիս ամսվա գնային ինդեքսը:

«Ագրարագյուղացիական միավորում» ՀԿ նախագահ Հրաչ Բերբերյանի կարծիքով՝ սա իհարկե կանդրադառնա հայաստանյան գների վրա։

«Իհարկե, և՛ ռուսական շրջանում գները կբարձրանան, և՛ ամբողջ աշխարհում։ Այսօր ժողովուրդն ուղղակի պահուստային գումարներ պետք է ունենա այս վիճակից դուրս գալու համար։ Շատ վատ է վիճակը,  որ բանկերն են այսօր խեղդում վարկատուներին։ Կարծում եմ, կառավարությունը սրանով խիստ պետք է զբաղվի, այլապես լուրջ ընդհարումներ կլինեն»,- Factor.am-ի հետ զրույցում նշեց Բերբերյանը։

Վերջինիս խոսքով՝ հիմնականում թանկ է մրգեղենն ու տավարի միսը: Մսի է՛լ ավելի թանկացմանը կնպաստի հուլիսի 1-ից գործող սպանդանոցային մորթի պարտադիր պահանջը։

«Ծիրանը խանութներում 800 դրամից չի իջնում, իսկ արդեն սեզոնի վերջն է, գիլասը 800-1000 դրամից չի իջնում, լոլիկը՝ 300-500 դրամ է, հիմնականում ջերմոցային լոլիկն է, դաշտինը չէ, վարունգն այս տարի մի քիչ ավելի թանկ է։ Հիմնականում թանկ են մրգեղենը, տավարի միսն է թանկացել, երևի նկատել եք շուկայում՝ մոտ 30 %-ով, անցյալ տարվա 3400-ի փոխարեն հիմա 4000 դրամ է փափուկ թարմ միսը։ Բնականաբար, էս օրենքն էլ  կազդի գների բարձրացման վրա, կառավարությունը էդպես էլ չհասկացավ, որ դա մասնավոր բիզնես է, ոչ թե կառավարության գործն է։ Դա կնպաստի գնաճին, ամեն մորթանոց իր գումարը կվերցնի։ Դա կոչվում է օդից փող բռնել»,- նշեց Բերբերյանը։

Անդրադառնալով Հայաստանում աշնանացան ցորենի արտադրության խթանման պետական աջակցության ծրագրին՝ որով պետությունը 70 դրամով կփոխհատուցի աշնանացան ցորենի սերմացուի ձեռքբերումը, Բերբերյանը դրական գնահատեց այն։

«Այն գաղափարը, որ հնարավոր է՝ Հայաստան 2-3, մինչև 5 հազար տոննա թարմ սերմացու մտնի, որով կապահովվի և ցանքատարածությունների ավելացումը և ցանքաշրջանառությունը, իհարկե ողջունելի է։ Սա օգուտ է գյուղացուն, մեզ մոտ ցանքատարածությունները 1-2 տարում կավելանան։ Այս հարցում ողջունում ենք կառավարությանը։ Ուղղակի այնպես չլինի, որ բերեն առաջվա պես դիզվառելիքը բաժանեն, հետո պարզվի՝ զիբիլ են բերել։ Դրա համար մենք երեկ էլ պահանջեցինք կառավարությունից, որ վարչապետին կից գյուղատնտեսության կառավարման խորհուրդ գործի, որ գրպանահատները չմտնեն գյուղացու գրպանը»,- եզրափակեց Հրաչ Բերբերյանը։