29.04.2026 | 21:13
Մերցը պնդում է, որ Թրամփի հետ իր հարաբերությունները «մնում են լավ», չնայած ԱՄՆ նախագահի քննադատությանը
ՌԴ Սահմանադրությունում փոփոխությունները սատարել է ընտրողների 77.92%-ը․ ԿԸՀ
Քաղաքականություն
02.07.2020 | 13:13
ՌԴ Սահմանադրությունում փոփոխությունները սատարել է ընտրողների 77.92%-ը, դեմ է արտահայտվել՝ 21.27%-ը։ Այս մասին հայտնել է երկրի Կենտրոնական ընտրական հանձնաժողովը։ Քվեարկությանը մասնակցությունը կազմել է շուրջ 65%, գրում է ՌԻԱ Նովոստին։
Մասնավորապես, Չեչնիայում և Դաղստանում փոփոխություններին կողմ է արտահայտվել ընտրողների ավելի քան 90%-ը։
Միաժամանակ, Նենեցկի ինքնավար մարզը դաշնության միակ շրջանն է, որտեղ քաղաքացիների մեծ մասը դեմ է արտահայտվել փոփոխություններին։ Ըստ տվյալների՝ այստեղ փոփոխություններին դեմ է արտահայտվել ընտրողների շուրջ 54%-ը։
Մայրաքաղաք Մոսկվայում, ԿԸՀ-ի տվյալներով, փոփոխություններին կողմ է արտահայտվել 65․9%-ը, դեմ՝ 33․1%-ը։
Մինչ այդ, անկախ դիտորդները հայտնել են զանգվածային կեղծարարության մասին՝ նշելով, որ նման ծավալի ընտրախախտումներ ՌԴ-ում չեն արձանագրվել 2011 թվականից ի վեր։ ԿԸՀ նախագահ Էլլա Պամֆիլովան, սակայն, հայտնել է, որ քվեարկության ամբողջ ընթացքում «լուրջ խախտումներ, որոնք Հանձնաժողովի քննության առարկա կարող էին դառնալ, չեն հայտնաբերվել»։
Հիշեցնենք, որ հանրաքվեի էր դրվել ՌԴ Հիմնական օրենքի միանգամից 22 հոդվածի փոփոխություն։ Մարտի 10-ին փոփոխություններն արդեն հավանության էին արժանացրել երկրի Պետական դուման, Դաշնային խորհուրդը և Սահմանադրական դատարանը։
Ընդդիմությունը 67-ամյա Վլադիմիր Պուտինին մեղադրում է «ցմահ նախագահ» դառնալու ձգտման համար։ ՌԴ գործող Սահմանադրության համաձայն՝ նախագահը չի կարող երկրի բարձրագույն պետական պաշտոնը զբաղեցնել ավելի քան երկու ժամկետ անընդմեջ։ Քվեարկության դրված փոփոխություններով նախկին նախագահների պաշտոնավարման ժամկետները զրոյացվում են, ինչը Վլադիմիր Պուտինին հնարավորություն կընձեռի իր թեկնածությունն առաջադրել 2024 և 2030 թվականների նախագահական ընտրություններում՝ այդ պաշտոնում մնալով մինչև 2036 թվականը։
