01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Մոսկվայի Կարմիր հրապարակում «2036» ակցիայի մասնակիցների են ձերբակալել
Քաղաքականություն
01.07.2020 | 21:29
Մոսկվայի Կարմիր հրապարակում «2036» ակցիայի ութ մասնակցի են ձերբակալել, որոնք պառկել են հրապարակի կենտրոնում՝ իրենց մարմիններով 2036 թիվը ձևավորելով։ Այս մասին գրում է DW-ի ռուսական ծառայությունը՝ վկայակոչելով «Правозащита Открытки» կազմակերպությունը։
Նշվում է, որ ՌԴ Սահմանադրությունում փոփոխությունների ընդունման դեպքում մինչև 2036 թվականը Վլադիմիր Պուտինը հնարավորություն կունենա մնալ Ռուսաստանի նախագահի պաշտոնում։
Ակցիայի մասնակիցների թվում են եղել Մոսկվայի Բասմանի շրջանային պատգամավորներ Լյուսյա Շտեյնը և Վիկտոր Կոտովը, Pussy Riot շարժման անդամներ Ալեքսանդր Սոֆեևը և Նիկա Նիկուլշինան, ակտիվիստներ Մարիա Բեզվերխայան, Գոշա Կոժևնիկովը, Լիզա Սամոյլովան և Մարիա Տիմոֆեևան։ Բոլորը ՆԳՆ բաժանմունք են տեղափոխվել։
Նշենք, որ ՌԴ-ում այսօր Սահմանադրության փոփոխությունների հանրաքվեի վերջին օրն էր։ Կորոնավիրուսի համաճարակի պատճառով քվեարկությունը սկսվել է դեռևս հունիսի 25-ին՝ ընտրատեղամասերում քաղաքացիների կուտակումներից խուսափելու համար։
Հանրաքվեի է դրվել ՌԴ Հիմնական օրենքի միանգամից 22 հոդվածի փոփոխություն։ Մարտի 10-ին փոփոխություններն արդեն հավանության են արժանացրել երկրի Պետական դուման, Դաշնային խորհուրդը և Սահմանադրական դատարանը։
Ընդդիմությունը 67-ամյա Վլադիմիր Պուտինին մեղադրում է «ցմահ նախագահ» դառնալու ձգտման համար։ ՌԴ գործող Սահմանադրության համաձայն՝ նախագահը չի կարող երկրի բարձրագույն պետական պաշտոնը զբաղեցնել ավելի քան երկու ժամկետ անընդմեջ։ Քվեարկության դրված փոփոխություններով նախկին նախագահների պաշտոնավարման ժամկետները զրոյացվում են, ինչը Վլադիմիր Պուտինին հնարավորություն կընձեռի իր թեկնածությունն առաջադրել 2024 և 2030 թվականների նախագահական ընտրություններում՝ այդ պաշտոնում մնալով մինչև 2036 թվականը։
