11.01.2025 | 20:13
Կրակը Գլենդելից հեռու է. քաղաքապետը մանրամասներ է ներկայացրել
Մի շարք դատական ակտերի կատարման համար ՊՆ-ն ստիպված է եղել որոշակի ծրագրերի կրճատումներ կատարել․ ՊՆ պարզաբանումը
Հասարակություն
19.06.2020 | 17:40
Պաշտպանության նախարարը օրենքով իրեն վերապահված լիազորությունների շրջանակներում համապատասխան միջոցներ է ձեռնարկել դատարանի օրինական վճիռը իրականացնելու ուղղությամբ։ Այս մասին Factor.am-ին տեղեկացրեց պաշտպանության նախարար Դավիթ Տոնոյանի մամուլի խոսնակ Շուշան Ստեփանյանը՝ պարզաբանելով ՊՆ պահեստազորի սպա Ցոլակ Խաչատրյանի և Պաշտպանության նախարարության միջև ծագած խնդիրը։
«Դատարանի վճիռը կոչված է ապահովելու օրենքի կատարումը, իսկ օրենքով սահմանված ընթացակարգերն իրականացնելը տևում է որոշակի ժամանակահատված։ Հարկ է նշել, որ Պաշտպանության նախարարությանը հատկացվող բյուջետային միջոցների յուրաքանչյուր լումա ունի իր գործառնական նշանակությունը և նախատեսված է կոնկրետ ծրագրի իրականացման համար, որի մեջ ներառված չեն նախկինում հնարավոր թերացումների, իրավական չկարգավորված հարցերի հետևանքով առաջացած ծախսերը, Ցոլակ Խաչատրյանի և այլ զինծառայողների պահանջմունքների բավարարումը։
Ոչ միայն Ցոլակ Խաչատրյանի մասով, այլև օրինական ուժի մեջ մտած մի շարք այլ դատական ակտերի կատարումն ապահովելու նպատակով Պաշտպանության նախարարությունը ստիպված էր իրականացնել որոշակի ծրագրերի կրճատումներ։ Այդ նպատակով ՀՀ պաշտպանության նախարարությունը գարնանը սահմանված կարգով նախաձեռնել է բյուջետային միջոցների վերաբաշխում։ Համապատասխան ընթացակարգերն ավարտված են և շահառուի կողմից բանկային վավերապայմանները տրամադրելուց հետո առաջիկայում կիրականացվի վճռի կատարումը։ Ինչ վերաբերում է քրգործ հարուցելուն, ապա այդ մասին պաշտոնապես մեզ դեռ չի տեղեկացվել։ Եվ մի հավելում՝ չի կարող քրգործ հարուցվել նախարարի դեմ, գործ կարող է հարուցվել փաստի առթիվ»,- նշեց Շուշան Ստեփանյանը։
Հիշեցնենք, որ ՊՆ պահեստազորի սպա Ցոլակ Խաչատրյանը հանցագործության մասին հաղորդում է ներկայացրել պաշտպանության նախարար Դավիթ Տոնոյանի դեմ, ինչի հիման վրա Զինվորական քննչական կայազորային 4-րդ վարչությունում հարուցվել է քրեական գործ։
Քրեական գործը հարուցվել է Քրեական օրենսգրքի 353-րդ հոդվածի 1-ին մասով (օրինական ուժի մեջ մտած դատավճիռը, վճիռը կամ դատական այլ ակտը, դատական ակտում սահմանված ժամկետում կամ ժամկետ սահմանված չլինելու դեպքում դատական ակտն ուժի մեջ մտնելուց հետո` մեկամսյա ժամկետում, պետական և տեղական ինքնակառավարման մարմինների պաշտոնատար անձանց կողմից դիտավորությամբ չկատարելը)։
Անժելա Պողոսյան
