24.05.2026 | 15:50
Տեղամասային կենտրոնի փոփոխություն՝ օնլայն դիմումով․ ԿԸՀ-ի պարզաբանումը
ՄԻՊ աջակցությամբ վերականգնվել է քաղաքացու հաշմանդամության խումբը
Հասարակություն
22.11.2017 | 13:53
Հաշմանդամության խմբի փոփոխությունից դժգոհ քաղաքացին դիմել է Հայաստանի մարդու իրավունքների պաշտպան Արման Թաթոյանին։
Դիմումատուի հայտնած տեղեկությունների համաձայն՝ վեց տարի շարունակ բժշկասոցիալական փորձաքննության արդյունքում իր նկատմամբ սահմանվել է հաշմանդամության 2-րդ խումբ։ Այս տարի ևս այն երկարացվել է մեկ տարի ժամկետով, սակայն փորձաքննությունից երկու ամիս անց զանգահարել են, կանչել վերափորձաքննության և արդյունքում՝ սահմանել հաշմանդամության 3-րդ խումբ։
Պաշտպանի աշխատակազմում սկսված քննարկման ընթացակարգի շրջանակում գրություն է հասցեագրվել Հայաստանի աշխատանքի և սոցիալական հարցերի նախարարություն՝ քաղաքացու նկատմամբ հաշմանդամության 3-րդ խումբ սահմանելու հիմնավորվածության վերաբերյալ պարզաբանում ստանալու նպատակով։ Առաջարկվել է նաև քննարկել հանձնաժողովի ընդլայնված կազմով վերափորձաքննություն իրականացնելու հարցը։
Արդյունքում, տեղի է ունեցել բժշկասոցիալական վերափորձաքննություն և արձանագրվել է քաղաքացու առողջական վիճակի վատթարացում, ինչով պայմանավորված էլ վերականգնվել է քաղաքացու հաշմանդամության 2-րդ խումբը:
Հարգանքով՝
ՀՀ մարդու իրավունքների պաշտպանի աշխատակազմի հանրային կապերի բաժին
