10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
ՀՎԿ-ից Արկադի Փելեշյանն ընտրվեց Վանաձորի քաղաքապետի առաջին տեղակալ
Քաղաքականություն
21.11.2017 | 15:10
Վանաձորի ավագանու արտահերթ նիստում «Հայկական վերածնունդ» խմբակցության ղեկավար Արկադի Փելեշյանն ընտրվեց Վանաձորի քաղաքապետի առաջին տեղակալ:
Արկադի Փելեշյանին Վանաձորի քաղաքապետի առաջին տեղակալ ընտրելու հարցին կողմ քվեարկեց ավագանու անդամների մեծամասնությունը:
« Նախ ցանկանում եմ շնորհակալություն հայտնել արձագանքի համար, որովհետև ես իմ նախորդ բոլոր հրապարակային ելույթներում միշտ ասել եմ, որ մենք պատրաստ ենք ցանկացած առողջ համագործակցության: Հույս ունեմ, որ մեր համագործակցությունը դրական տեղաշարժ է բերելու Վանաձորի համար: Սա լոկալ մակարդակում համագործակցության հուշագիր է»,- մինչ քվեարկությունը հայտարարեց Վանաձորի քաղաքապետ Մամիկոն Ասլանյանը:
Նիստից հետո լրագրողների հետ զրույցում նորընտիր փոխքաղաքապետն ընդգծեց՝ թեև ինքը ընտրել էր «Լուսավոր Հայաստան» խմբակցության ղեկավար Քրիստ Մարուքյանին, բայց փոշմանել է:
«Ուզում էի, որ նա քաղաքապետը լիներ, բայց շատ եմ փոշմանել դրա համար: Այս մեկ տարվա ընթացքում ես տեսա, որ բոյկոտի արդյունքում ոչ մի բան չի փոխվում: Այսօր եկել եմ աշխատեմ ու մեր ժողովրդի համար մի լավ բան անեմ»,- նշեց Արկադի Փելեշյանը:
Վերջինս հայտնի է իր կրիմինալ անցյալով: Նրա մասնակցությամբ տեղի ունեցած վերջին միջադեպերից մեկն էլ տեղի ունեցավ հենց ՏԻՄ ընտրություններից հետո: Փելեշյանը դաժան ծեծի էր ենթարկել Վանաձորի Ավետարանական հավատքի քրիստոնեական եկեղեցու առաջնորդ Ռաֆիկ Գրիգորյանին:
Հիշեցնենք՝ նոյեմբերի 10-ին Սահմանադրական դատարանը մասամբ բավարարեց «Ելք» և «Ծառուկյան» դաշինքի 26 պատգամավորների հայցը ՝ հակասահմանադրական ճանաչելով Վանաձորի ավագանու ընդունած բոլոր որոշումները:
«Լուսավոր Հայաստան» կուսակցությունը երեկ նամակով դիմել է կառավարություն՝ Վանաձորի ավագանու գործունեությունը դադարեցնելու և նոր ընտրություններ նշանակելու պահանջով։
