Քաղաքականություն
21.11.2017 | 12:40Ռուսաստանի արտաքին գործերի նախարար Սերգեյ Լավրովի համոզմամբ՝ Ղարբաղյան հակամարտության կարգավորման համար անհրաժեշտ բոլոր տարրերն առկա են:
«Այդ տարրերն ամփոփված են բազմաթիվ փաստաթղթերում, որոնք սկսած 2007 թվականից, 2009 թվականից, 2011 թվականից հանձնվել են ԵԱՀԿ ընդհանուր քարտուղարին: Կուզեմ ընդգծել այն, որ այս տարրերը ձևավորվել են մի փաթեթում, և շատ դժվար է վերցնել դրանցից մեկը, երկուսը կամ երեքը և ասել՝ եկեք դրանց հիման վրա համաձայնության հասնենք: Այդ դեպքում հավասարակշռող տարրերը դուրս կմնան, և չի լինի այն արդյունքը, որը բոլորս ակնկալում ենք: Հայաստանի և Ադրբեջանի նախագահները դրական խոսեցին ժնևյան հանդիպման մասին, շատ կարևոր է, որպեսզի այդ դրական վերաբերմունքն օգնի մեզ առաջ գնալ ըստ էության։ Համանախագահները դրանով զբաղվում են։ Մենք, Վաշինգտոնը, Փարիզը կվերլուծենք, թե ուր ենք հասել, կփորձենք ինչ-որ ակտիվ ջանքեր գործադրել՝ կարգավորման հասնելու»,- ընդգծեց Ռուսաստանի արտաքին գործերի նախարարը:
«Բայց ես չափազանց լավատեսություն չեմ ցուցաբերի, սա դժվար խնդիր է, և հակամարտությունների կագավորման փորձը ցույց է տալիս, որ նման հակամարտություններն արագ չեն կարգավորվում»,- հավելեց Սերգեյ Լավրովը:
«Չնայած Ադրբեջանի ոչ կառուցողական դիրքորոշմանը՝ պետք է շարունակել բանակցությունները, և Հայաստանը տրամադրված է համանախագահների հետ կառուցողական ձևով շարունակել հանդիպումներն՝ արտգործնախարարների, նախագահների մակարդակով, – հայտարարեց Հայաստանի արտգործնախարար Էդուարդ Նալբանդյանը, ապա հավելեց,- Մենք երբևէ չենք հրաժարվել հանդիպել ո՛չ նախարարների, ո՛չ նախագահների մակարդակով»։
