Երբ իշխանության ֆեյսբուքյան լայվերը պրոֆեսիոնալների խոսքից կարևոր են. ի՞նչ են առաջարկում մասնագետները. ՏԵՍԱՆՅՈՒԹ

Կորոնավիրուսի դեմ պայքարը միայն առողջապահական հարց չէ. դրա արդյունավետությունը մեծապես կախված է քաղաքացիների վարքագծից, որը մասնագետների կողմից բավարար չափով  ուսումնասիրված չէ:  Կրթության փորձագետ Սերոբ Խաչատրյանն առաջարկում է կառավարությանը կից ստեղծել հանձնախումբ, որի կազմում ներառված կլինեն ազգագրագետներ, մշակութաբաններ, հոգեբաններ, վարքաբաններ, հանրային կապերի և հարակից այլ ոլորտների մասնագետներ, որոնք կմշակեն համապատասխան նորմեր՝  հանրության  և իշխանության վարքագծի վրա  ազդելու համար:

Ազգագրագետ Հրանուշ Խառատյանը հանձնախումբ ձևավորելու գաղափարը ողջունելի է համարում: Ըստ նրա՝  դրա շնորհիվ հնարավոր կլինի վերլուծել հանրային վարքի սոցիո-էթնո մշակութային նորմերն ու համապատասխան առաջարկներ ներկայացնել, օրինակ, պարետատանը, որն էլ իր հերթին կկարողանա առավել նպատակային որոշումներ կայացնել:

Հոգեբան Սամվել Խուդոյանը շեշտում է՝ իշխանությունը չի կարող ֆեյսբուքյան լայվերի միջոցով հանրությանը իրազեկել կամ կոչեր անել: Նա ևս կարևորում է այդ  և այլ հարցերում պրոֆեսիոնալների ներգրավվածությունը:  Պարոն Խուդոյանի համոզմամբ՝ էականն  այն է, որ այս փուլում ո՛չ իշխանությունը, ո՛չ հանրությունը խուճապի չմատնվի: Այդ հարցում տարբեր  մասնագետների դերն իսկապես որոշիչ կարող է լինել:

Կրթության, գիտության, մշակույթի և սպորտի նախարարի տեղակալ Ժաննա Անդրեասյանը կարևորում է հանրության վարքի ուսումնասիրումը, սակայն դրա համար, ըստ նրա, անհրաժեշտ են ինստիտուցիոնալ գործիքներ:

Հրանուշ Խառատյանն իր հերթին շեշտում է՝ պետությունը նույնիսկ իր ձեռքի տակ եղած տեղեկատվության, տարատեսակ նյութերի  վերլուծություն չի կատարում, ուր մնաց՝ զբաղվի նոր տվյալների ձեռքբերմամբ և վերլուծությամբ:

Ինչ վերաբերում է ամենատարբեր կառույցների գործունեության արդյունավետությանը, փոխնախարարը ևս այդ առումով երաշխիքներ չունի, ասում է՝ հստակ արդյունքը հասկանալու նպատակով մի առանձին փորձագիտական ուսումնասիրություն էլ դրա համար է հարկավոր իրականացնել: Ժաննա Անդրեասյանը նշում է՝ մի խնդիր է, օրինակ՝ հանձնախումբ ձևավորելը, մեկ այլ խնդիր՝ դրա արդյունավետ աշխատանքն ապահովելը:

Ամեն դեպքում, մի բան հստակ է՝ կորոնավիրուսի պայմաններում իշխանության և հանրության միջև արդյունավետ երկխոսություն դեռևս չի կայացել: Հատուկ հանձնախմբի ստեղծմամբ, թե որևէ այլ մեխանիզմի  կիրառմամբ՝  մասնագետների ներառումը պրոցեսին պարզապես  անհրաժեշտություն է:

Աննա Բաբաջանյան