Արգիշտի Քյարամյանի համար ստեղծված ՔԿ նախագահի 5-րդ տեղակալի հաստիքը մեկ ամիս է՝ թափուր է

Այսօր՝ հունիսի 5-ին, լրացավ մեկ ամիսը ինչ Քննչական կոմիտեի նախագահի 5-րդ տեղակալի պաշտոնը թափուր է: ՔԿ նախագահը 5-րդ տեղակալ ունեցել է ընդամենը մի քանի ժամով, երբ ՊՎԾ պետի պաշտոնակատար Արգիշտի Քյարամյանը նշանակվեց այդ պաշտոնին, ստացավ սպայի դասային կոչում և տեղափոխվեց ԱԱԾ:

Նա արդեն մեկ ամիս է՝ զբաղեցնում է ծառայության տնօրենի առաջին տեղակալի պաշտոնը: Կառավարության e-gov.am կայքում՝ վարչապետի որոշումների բաժնում չկա ՔԿ նախագահի նոր տեղակալի նշանակման համապատասխան որոշում: ՔԿ-ից էլ մեզ փոխանցել են, որ նախագահը 5-րդ տեղակալ այս պահին չունի, թեև հաստիքն առկա է:

Արգիշտի Քյարամյանին ՔԿ նախագահի տեղակալ, իսկ հետո՝ մի քանի ժամ անց, ԱԱԾ տնօրենի տեղակալ նշանակելը ենթադրությունների տեղիք տվեց, որ ՔԿ նախագահի 5-րդ տեղակալի հաստիքը ստեղծվել է հենց Քյարամյանին արագ ԱԱԾ տեղափոխելու համար:

Բանն այն է, որ ըստ օրենքի, ԱԱԾ-ում սպայական կոչումներ ստանալու համար պետք է տարիներով աշխատել այդ համակարգում, մինչդեռ ՔԿ-ի պարագայում` կարելի է բարձր կոչում ստանալ առանց տարիներ կորցնելու: ԱԱԾ տնօրեն կամ տեղակալ նշանակվելու համար անհրաժեշտ է գնդապետի կոչում կամ դրան հավասարազոր այլ պաշտոնի նշանակված լինեը, ինչպիսին, օրինակ, ՔԿ նախագահի տեղակալն է:

ՔԿ նախագահի հինգերորդ տեղակալի պաշտոնը հենց Քյարամյանի համար ստեղծելու մասին է խոսում այն, որ հաստիքը կառավարության որոշմամբ բացվել է այս տարվա ապրիլի 30-ին, ինչից ուղիղ հինգ օր անց Արգիշտի Քյարամյանը նշանակվել է այդ պաշտանին և ազատվել:

Հիշեցնենք՝ Արգիշտի Քյարամյանը հանրությանը հայտնի դարձավ հեղափոխական պաշտոնյայի համար իր աննախադեպ հայտարարությամբ։ Նա հենց կառավարությունում, Factor.am-ի հարցերին ի պատասխան, հրաժարվեց պարզաբանել, թե իր և կնոջ հայտարարագրում առկա միլիոններն ինչպես են ձևավորվել։ Եվ մինչ վարչապետ Փաշինյանը հայտարարում էր, որ բոլոր պաշտոնյաների ունեցվածքի ծագումնաբանությունը պետք է հասանելի լինի հանրությանը, Քյարամյանը հայտարարում էր, որ իր ունեցվածքի մասին հարցերն էթիկայից դուրս են։

Նարեկ Կիրակոսյան