11.01.2025 | 19:09
Երկրաշարժ Սպիտակ քաղաքից 1 կմ հյուսիս
Թրամփն անկարգությունները «ներքին ահաբեկչություն» է որակել և սպառնացել դրանք ճնշել բանակի օգնությամբ
Քաղաքականություն
02.06.2020 | 16:08
ԱՄՆ նախագահ Դոնալդ Թրամփը երկրի մի շարք նահանգներում բռնկված անկարգությունները «ներքին ահաբեկչություն» է որակել։ Նա նաև հայտարարել է, որ դրանք ճնշելու համար պատրաստ է դիմել զինվորականների օգնությանը, հաղորդում է DW-ի ռուսական ծառայությունը։
«Եթե այս կամ այն քաղաքը կամ նահանգը խուսափում է անհրաժեշտ միջոցառումներ ձեռնարկել՝ իր բնակիչների կյանքն ու գույքը պաշտպանելու համար, ես կօգտագործեմ ԱՄՆ զինված ուժերն ու նրանց փոխարեն արագորեն կլուծեմ խնդիրը»,- ասել է Թրամփը։
Ամերիկյան լրատվամիջոցների հաղորդմամբ՝ ԱՄՆ նախագահն ավելի վաղ նահանգապետերին կոչ է արել ավելի խիստ գործել ցուցարարների նկատմամբ և անկարգությունները կանխելու համար ուժ գործադրել։
Նշենք, որ Թրամփի ելույթից կարճ ժամանակ առաջ ոստիկանությունն ուժի կիրառմամբ ցրել է Սպիտակ տան մոտ հավաքված ցուցարարներին։ Նրանց նկատմամբ արցունքաբեր գազ և լուսաձայնային նռնակներ են օգտագործվել։
ԱՄՆ-ում ցույցերի ալիքի պատճառ է դարձել 46-ամյա աֆրոամերրկացի Ջորջ Ֆլոյդի մահը, որին ձերբակալելիս խեղդել է սպիտակամորթ ոստիկանը։ Ցույցերը վերածվել են անկարգությունների և իրավապահների հետ բախումների։
Ամերիկյան մի շարք քաղաքներում պարետային ժամ է սահմանվել, ներգրավվել է Ազգային գվարդիան։
