Մինեսոտայում անկարգությունները ճնշելու մեջ Ազգային գվարդիայի ռեկորդային թվով ծառայողներ են ներգրավված

Աֆրոամերիկացի Ջորջ Ֆլոյդի մահից հետո սկսված բողոքի ցույցերի պատճառով արտակարգ իրավիճակ է հայտարարվել Ջորջիա նահանգի Ֆուլթոն շրջանում և Պորտլենդ քաղաքում։ Մինեսոտայում բողոքի գործողությունների ճնշման գործում ներգրավված է Ազգային գվարդիայի 1700 ծառայող։ Այս մասին գրում է DW-ի ռուսական ծառայությունը։

Շաբաթ ԱՄՆ-ի մի շարք քաղաքներում ռասիզմի և ոստիկանական բռնությունների դեմ բողոքի գործողությունները շարունակվում են՝ ուղեկցվելով նաև անկարգություններով։ Ազգային գվարդիայի հազարավոր ծառայողների ներգրավումը ռեկորդային է այս նահանգի 164-ամյա պատմության մեջ։

Մինեսոտայի երկու քաղաքներում՝ Մինեապոլիսում և Սենթ Փոլում արտակարգ իրավիճակ է հայտարարվել՝ երեկոյան 8-ից մինչև առավոտյան ժամը 6-ը։ Նահանգապետ Թիմ Ուոլզը կոչ է արել բնակիչներին մնալ տանը, քանի որ «իրավիճակը դարձել է վտանգավոր»։

Նահանգապետին հղում անելով՝ միջազգային լրատվամիջոցները հաղորդում են, որ Մինեապոլիսում ցուցարարները կրակել են ոստիկանների ուղղությամբ, նրանցից երկուսը վիրավորվել է, նրանցից մեկը հետագայում մահացել է։ Բողոքի գործողություններ են անցկացվել նաև ԱՄՆ-ի այլ քաղաքներում՝ Նյու Յորք, Վաշինգտոն, Լուիսվիլլ։

Հիշեցնենք, որ մայիսի 25-ին 46-ամյա աֆրոամերիկացի Ջորջ Ֆլոյդը մահացել էր այն բանից հետո, երբ սպիտակամորթ ոստիկանը, երեք գործընկերների աջակցությամբ, 10 րոպե տևողությամբ ոտքերով սեղմել են նրա կոկորդը։ Չորս ոստիկաններն ազատված են աշխատանքից։ Հիմնական մեղադրյալը կալանավորված է, մեղադրանք է առաջարված անփույթ սպանության համար, իսկ մյուս երեքի մասով քննությունը շարունակվում է։