Քաղաքականություն
29.05.2020 | 12:18
Սամվել Շահրամանյանը նշանակվել է Արցախի Հանրապետության ռազմահայրենասիրության, երիտասարդության, սպորտի և զբոսաշրջության նախարար՝ ազատվելով ԱՀ Ազգային անվտանգության ծառայության տնօրենի պաշտոնից։ Այս մասին ֆեյսբուքյան ուղիղ եթերում հայտնել է Արցախի Հանրապետության նախագահ Արայիկ Հարությունյանը։ Շահրամանյանին շնորհվել է գեներալ-մայորի կոչում։
Հարությունյանը նշեց նաև մի քանի այլ նշանակումների մասին։ Արցախի նախագահի խոսքով՝ ամենամեծ խնդիրներից մեկը լինելու է հակահրդեհային միջոցառումներ իրականացնելը, քանի որ ամեն տարի բերքահավաքի ժամանակ տեղի է ունենում աղետ: Հարությունյանը ընթերցեց Արտակարգ իրավիճակների պետական ծառայության տնօրենի նամակը, ըստ որի՝ այս հարցում թերացել են Մարտունիի եւ Քաշաթաղի շրջանները:
«Որոշում է կայացվել Քաշաթաղի շրջանի վարչական ղեկավար Ստեփան Սարգսյանին ազատել աշխատանքից: Հանձնարարությունները չկատարելու դեպքում լինելու են նման որոշումներ»,-ասաց նախագահը:
Քաշաթաղի վարչակազմի ղեկավարի պաշտոնում նշանակվել է Արտյոմ Սարիբեկյանը, իսկ Շուշիի շրջանի վարչակազմի ղեկավար է նշանակվել Էրիկ Հարությունյանը։
