11.12.2024 | 14:19
Նոյեմբերին Հայաստան այցելել է 152,976 զբոսաշրջիկ
Քաջարանցիները բացեցին ոստիկանության մեքենայի ճանապարհը․ իրավիճակը հանգուցալուծվեց խաղաղ. ՏԵՍԱՆՅՈՒԹ
Հասարակություն
24.05.2020 | 23:11
Այսօր ամբողջ օրվա ընթացքում Սյունիքի Քաջարան քաղաքում ստեղծված լարված իրավիճակը հանգուցալուծվեց խաղաղ՝ առանց բախումների և միջադեպերի։
Ըստ լրատվամիջոցների հրապարակումների՝ ոստիկանական գործողությունից հետո Քաջարանում բերման են ենթարկել 3 անձի։ Ըստ նրանց կողմնակիցների՝ չեն ներկայացվել փաստաթղթեր, և բաժանմունքում նրանց նկատմամբ բռնություն է գործադրվել։
Ոստիկանությունն այսօր փորձում էր բերման ենթարկվածներին տեղափոխել Երևան, սակայն մարդիկ փակել էին ոստիկանության մեքենաների ճանապարհը և թույլ չէին տալիս շարժվել։ Քաջարանի քաղաքապետ Մանվել Փարամազյանը քիչ առաջ հայտարարեց՝ իրեն հավաստիացրել են, որ բռնություն չի լինելու ձերբակալված անձանց նկատմամբ, իսկ բռնություն կիրառած անձինք կկրեն պատասխանատվություն:
«Այն անձինք, ովքեր ի սկզբանե բռնություն գործադրեցին, պատժվելու են օրենքի ողջ խստությամբ։ Ժողովուրդ ջան, դուք եք որոշում՝ ինչ անենք։ Համոզված եմ, որ երաշխիքներ իրենք տվել են։ Չեմ կասկածում՝ ՀՀ քրեական վարչության պետի ասածը, որ լինելու է օրինական դաշտում, չի կատարվի։ Քրեական գործ կա հարուցված, հետո կերևա՝ ով է անմեղ, ով՝ մեղավոր։ Երաշխիքները չպահելու դեպքում շատ վատ կլինեն հետևանքները։ Ես համոզված եմ, որ գործը լինելու է առանց բռնության։ Որոշենք ժողովուրդ ջան»,- հայտարարեց քաղաքապետը։
Կապանի ոստիկանության շենքի առաջ հավաքված մարդիկ հավանություն տվեցին քաղաքապետի առաջարկած տարբերակին՝ ոստիկանական մեքենային թույլ տալ շարժվել դեպի Երևան։
Այսօր Քաջարանի քաղաքապետը դուրս էր եկել Կապանի ոստիկանության շենքից ու հայտարարել, թե ձերբակալվածներին ինքը տեսել է և որ նրանք բռնության են ենթարկվել։ Ոստիկանությունում ծառայողական քննություն է սկսվել այս մասով։
