10.08.2026 | 12:04
11 տարի հետախուզման մեջ գտնվող՝ 10.9 մլն եվրո հափշտակության գործով մեղադրյալը հայտնաբերվել է. նախաքննությունն ավարտվել է
1 տարի 7 ամսվա ընթացքում ոչ ոքի չեն ասել՝ աչքիդ վերևն ունք կա. Հունան Պողոսյանը խոսեց ցուցարարների հետ
Հասարակություն
24.05.2020 | 19:54
Սյունիքի մարզպետ Հունան Պողոսյանը ժամանել է Կապան, որտեղ արդեն մի քանի ժամ է՝ Ոստիկանության շենքի առջև հավաքված քաջարանցիները պահանջում են ազատ արձակել ձերբակալված քաջարանցիներին՝ հայտարարելով, որ նրանց Ոստիկանությունում բռնության են ենթարկել։
Հունան Պողոսյանը փորձում է համոզել քաջարանցիներին վստահել քննությանը, ասում է, որ ոստիկանությունում բերման ենթարկվածին բռնության ենթարկելու գործով ծառայողական քննության արդյունքում մեղավորը կպատժվի, և կոչ է անում հանդարտվել ու դադարեցնել բողոքի ակցիան։
Նշենք, որ տասնյակ քաղաքացիներ են հավաքվել բողոքի։ Ցուցարարներից մեկը վրդովվեց մարզպետի խոսքից:
«Մենք նենց մարդկանց ենք մերժել, որ ձեզ հաստատ մերժելու ենք։ Մենք ուզում ենք, որ Դուք մեզ պաշտպանեք, իսկ Դուք համոզում եք՝ մեզ պաշտպանելու փոխարեն»,- ասաց նա։
Մարզպետն առաջարկեց, որ հարազատներից մոտ 15 մարդ իր հետ մտնի ներս, քննարկեն ու հասկանան իրավիճակը։ Մարզպետը հավաքվածներին կոչ արեց թուլ չտալ, որ ոմանք իրենց օգտագործեն։
«1 տարի 7 ամսվա ընթացքում ոչ ոքի չեն ասել՝ աչքիդ վերևն ունք կա»,- շեշտեց Պողոսյանը՝ հավելելով, որ այժմ զուտ դատաիրավական գործընթաց է ընթանում։
Հիշեցնենք, որ Կապանում այսօր լարված իրավիճակ է։ Ոստիկանության շենքի դիմաց հավաքվել են բազմաթիվ քաջարանցիներ, որոնք պահանջում են Երևան չտեղափոխել և ազատ արձակել բերման ենթարկված, ապա ձերբակալված իրենց համաքաղաքացիներին։ Շենքի առջև հավաքված հարազատների տեղեկություններով՝ ձերբակալվածներին Ոստիկանությունում ծեծի են ենթարկել։ Ոստիկանությունը հերքում է բռնություն գործադրելու մասին տեղեկությունները։
Նշենք, որ բերման ենթարկվածները երեքն են, մի հոգու՝ Նվեր Խաչատրյանին, սխալմամբ են բերման ենթարկել, ապա՝ ազատ արձակել։
Մերի Մարտիրոսյան
