«Միքայել Մինասյանը  թող ներկայացնի այն փաստերը, որոնց հիման վրա նման արտահայտություն է արել». ՊԵԿ նախագահը՝ ծխախոտի սկանդալի մասին

Հայաստանի երրորդ նախագահ Սերժ Սարգսյանի՝ հետախուզման մեջ գտնվող փեսա Միքայել Մինասյանը, որի անունն աներոջ իշխանության տարիներին կապվում էր մենաշնորհների, ապօրինի հարստանալու հետ, Փաշինյանների ընտանիքին  մի շարք կոռուպցիոն մեղադրանքներ է վերագրում: Սերժ Սարգսյանի փեսան մայիսի 12-ին և 18-ին հայտարարել էր, որ Նիկոլ Փաշինյանը, կինը՝ Աննա Հակոբյանը, կնոջ եղբայրը՝ Հրաչյա Հակոբյանը և Նիկոլ Փաշինյանի եղբորորդին՝ Սիփան Փաշինյանը, ներգրավված են մաքսանենգ ճանապարհով Հայաստանից Ռուսաստան արտահանված ծխախոտային սկանդալի մեջ: Հիշեցնենք՝ մինչ Մինասյանի հայտարարությունը, ապրիլի 29-ին տեղեկություն տարածվեց, որ ՌԴ հատուկ ծառայություններն ապրիլի 25-ին Կրասնոդարի օդանավակայանում մաքսանենգ ծխախոտի խմբաքանակ են կալանավորել, իսկ մյուս խմբաքանակը, ըստ Մինասյանի, մայիսի 9-ին առգրավվել է Վորոնեժում:

Միքայել Մինասյանը պնդում է նաև, որ այս գործընթացում ներգրավված է ՊԵԿ նախագահի տեղակալ Շուշանիկ Ներսիսյանը, որը ղեկավարում է Մաքսային ծառայությունը և մտերիմ է Աննա Հակոբյանի հետ:

Փաշինյանների ընտանիքն այս մեղադրանքները զրպարտություն է համարում: Հրաչյա Հակոբյանը կեղծ տեղեկությունը տարածողներին դատի է տվել, քննարկում է նաև Միքայել Մինասյանին դատի տալու հարցը:

Թեմայի շուրջ Factor.am-ը զրուցել է ՊԵԿ նախագահ Դավիթ Անանյանի հետ: Վերջինս թեև հերքեց Մինասյանի շրջանառած տեղեկությունները, սակայն հակված չէր այս թեմայով ծավալուն պարզաբանումներ տալուն։

-Պարոն Անանյան, ենթադրյալ մաքսանենգ ծխախոտի արտահանման գործով ի՞նչ նորություն կա:

-Սիգարետների արտահանման գործ կա՞: Դրանք բոլորը հերյուրանքներ են, ուզում եք, որ հերյուրանքները մեկնաբանե՞մ:

-Հայտարարություններ են հնչում, որ վարչապետի ընտանիքն է ներգրավված այդ գործընթացում։

-Չկա, այդպիսի գործ չկա: Սիգարետի գործ հասկացությունը… պետք է հասկանալ կա՞ նման քրեական գործ, կա՞ որևէ կարգավիճակ ունեցող պրոցես: Չկա նման գործ, որովհետև ամեն ինչ իրականացվել է օրենքի տառին համապատասխան և որևէ գործ լինել չի կարող: Կարող է լինի ուղղակի գործ՝ մարդկանց հերյուրանքները քննելու համար:

-Իսկ այդպիսի գործ կա՞։

-Տեղեկություններ չունեմ:

-Ինչո՞ւ է Ձեր տեղակալներից Շուշանիկ Ներսիսյանի անունը շրջանառվում, Միքայել Մինասյանը պնդում է, որ նա աջակցել է մաքսանենգ արտահանմանը:

-Այդ նույն հարցը ես կարող եմ Ձեզ տալ՝ ինչո՞ւ է շրջանառվում իմ տեղակալի անունը: Դուք գիտե՞ք այդ հարցի պատասխանը: Ես ևս չգիտեմ, եթե Դուք չգիտեք:

-Բայց ամեն դեպքում՝ այդ մաքսանենգ ծխախոտը առգրավվե՞լ է, թե՝ ոչ։

-Ո՞վ է առգրավել:

-Ռուսաստանի համապատասխան ծառայության կողմից  առգրավված չէ՞:

-Դուք նման տեղեկություն ունե՞ք: Ես չունեմ նման տեղեկություն:

-Նախկին դեսպանն է նման պնդում անում․․․

-Դե դա դեսպանին էլ հարցրեք: Թող ինքը ներկայացնի այն փաստերը, ինչի հիման վրա նման արտահայտություն է արել: Ինչո՞ւ եք ինձ հարցնում:

-Այսինքն՝ Կրասնոդարում և Վորոնեժում ծխախոտով բեռնված ինքնաթիռներ չե՞ն կալանավորվել:

-Ես չգիտեմ նման փաստ: Ապացույցներ ունե՞ք: Ես չգիտեմ նման փաստ, Դուք գիտե՞ք նման փաստ: Ո՞վ է ասում, «ասում են»-ը կատեգորիա չի իմ համար: Ես կյանքում միշտ փաստերով եմ խոսում:

-Այս տեղեկությունների տարածումից հետո Դուք Շուշանիկ Ներսիսյանի հետ քննարկում ունեցե՞լ եք:

-Ես տիկին Ներսիսյանի հետ ամենօրյա աշխատանքային քննարկումներ ունեմ: Ես չեմ ասելու, թե ինչ եմ քննարկում նրա հետ:

-Դուք բացառո՞ւմ եք, որ Հայաստանից անօրինական ծխախոտ է արտահանվել:

-Այդ ի՞նչ արտահայտություն եք անում: Հիմա դուք բացառո՞ւմ եք, որ մամուլի բոլոր ներկայացուցիչներն անկաշառ են: Ես ասում եմ, որ նման որևէ տեղեկատվություն չունեմ:

-Բայց Դուք ՊԵԿ-ի ղեկավարն եք, որի կազմի մեջ է նաև Մաքսային ծառայությունը:

-Դուք ասեցիք Ձեր հարցը, ես ասեցի իմ պատասխանը: Ես նման տեղեկատվություն չունեմ:

Նարեկ Կիրակոսյան