ՊՆ-ն տիեզերական անվանումով և տիեզերական միջոցներով ՓԲԸ է ստեղծում, որի գործունեությունը գաղտնի է

Պաշտպանության նախարարությունը նոր, տիեզերական անվանումով ձեռնարկություն է հիմնում՝ «Գեոկոսմոս» փակ բաժնետիրական ընկերություն: Այն նպատակ է ունենալու ձեռնարկատիրական գործունեություն իրականացնելու ճանապարհով շահույթ ստանալ: Ընկերության ստեղծման վերաբերյալ կառավարության որոշումը ներառված է գործադիրի վաղվա օրակարգում: Հարցը չզեկուցվող է, այսինքն, կառավարության անդամների հրապարակային քննարկման չի դրվելու:

Հայտնի է, որ «Գեոկոսմոս» ընկերության համար ձեռք է բերվել 108 քմ արտադրատարածք, երկրի հեռահար զոնդավորման տվյալների ընդունիչ կայան, համակարգիչներ, գրասենյակային կահույք, նաև մեկ ռուսական արտադրության մարդատար ավտոմեքենա, ԳԱԶ 31-010 մակնիշի:

Ինչո՞վ է զբաղվելու «Գեոկոսմոսը»՝ առուծախով, թ՞ե ինչ-որ արտադրանք է թողարկելու: Պաշտպանության նախարարության մամուլի քարտուղար Արծրուն Հովհաննիսյանը, պատասխանելով Factor.am-ի այս հարցերին, նշեց, որ կազմակերպության գործունեությունը գաղտնի է: Եվ ահա այս գաղտնի, անհայտ նպատակով ստեղծվող ձեռնարկությունը ահռելի կանոնադրական կապիտալ ունի՝ մոտ 420 մլն դրամ: Ստացվում է՝ հարկատուները հսկայական գումարներ են տալիս, բայց ոչ կարող են վերահսկել դրանց ծախսումը, ոչ էլ գոնե իմանալ, թե ինչին են դրանք ծառայեցվելու:

Դոկտոր, պրոֆեսոր, առողջապահության նախկին նախարար Արարատ Մկրտչյանը, որը կառավարման մասնագետ է և բազմաթիվ հետազոտություններ ունի պետական կառավարման հարցերին նվիրված, վստահեցնում է, որ պաշտպանական գերատեսչությունն ու այլ ուժայինները դեռևս խորհրդային ժամանակներից արտոնյալ են եղել բյուջեն ծախսելու հարցում: «Դա նոր երևույթ չի մեր իրականության մեջ: Այո, կան նախարարություններ, որոնք առաջին հորիզանականի վրա են գտնվում՝ ՊՆ-ն, ոստիկանությունը, այլ ուժայինները: Հետո գալիս են միջին տեղում գտնվող՝ ֆինանսական գերատեսչությունները: Դրանք նվազ արտոնյալ են, գումարներ են հավաքագրում և բաժանում: Եվ միայն վերջում, այսպես ասած, «ավլեմ-թափեմ փոշին» նախարարություններն են՝ սոցապը, կրթության ու առողջապահության նախարարությունները»:

Սյուզան Սիմոնյան