30.08.2026 | 12:31
Վթարային ջրանջատում Քաղաքեռ Զեյթունում
Լուկաշենկոն հիշեցրել է ԵՏՄ տարածքում գազի գնի չլուծված խնդրի մասին
Տնտեսություն
19.05.2020 | 13:56
Եվրասիական տնտեսական բարձրագույն խորհրդի՝ այսօր մեկնարկած տեսակոնֆերանսի ժամանակ Բելառուսի նախագահ Ալեքսանդր Լուկաշենկոն նշել է, որ առայժմ չի լուծվել ԵՏՄ ընդհանուր շուկայում գազամատակարարման ծառայությունների համար գնագոյացման հարցը: Նշենք, որ խնդրին իր ելույթում անդրադարձել է նաև ՀՀ վարչապետ Նիկոլ Փաշինյանը:
«Փոխադարձ ընդունելի վերջնական որոշման մենք չենք կարողանում հասնել արդեն մի քանի տարի: Այն դեպքում, երբ խնդրի հրատապությունը մշտապես աճում է: Այսօր մենք պետք է գտնենք բոլորին անհրաժեշտ կոնսենսուսը»,- Լուկաշենկոյի խոսքն է մեջբերում Belta.by-ն:
Անդրադառնալով նիստի օրակարգին՝ նա նշել է, որ գլխավոր հարցը մինչև 2025 թվականը եվրասիական տնտեսական ինտեգրման զարգացման ռազմավարական ուղղությունների ընդունումն է:
«Այդ փաստաթուղթը միաժամանակ նաև հարաբերությունների խորացմանն ուղղված գործողությունների պլան է, շրջադարձային կետ մեր երկրների տնտեսությունների զարգացման տեմպի վերականգնման և աճի ճանապարհին»,- հավելել է Բելառուսի նախագահը:
Նա, միաժամանակ, շեշտել է, որ փաստաթղթի մշակման ընթացքը բարդ էր, բայց, ընդհանուր առմամբ, կողմերին հաջողվել է համաձայնեցված լուծումներ գտնել ինտեգրման խորացման բոլոր ուղղությունների համար:
