08.11.2024 | 21:30
Վթար Երևան-Գյումրի ավտոճանապարհին. կան տուժածներ
Թրամփը հեռացրել է Պետդեպարտամենտի գլխավոր տեսուչին
Քաղաքականություն
17.05.2020 | 15:28
ԱՄՆ-ի Պետդեպարտամենտի գլխավոր տեսուչ Ստիվ Լինիքը դարձավ երկրի նախագահ Դոնալդ Թրամփի կողմից պաշտոնանկ արված հերթական պաշտոնյան: Թրամփը հայտարարել է, թե ինքն արդեն կորցրել է Լինիքի նկատմամբ վստահությունը ու ավելացրել, որ վերջինս պաշտոնից կազատվի 30 օրից. գրում է Ամերիկայի ձայնը:
«Չափազանց կարեւոր է, որ գլխավոր տեսչի հարցում ես ունենամ լիակատար վստահություն»,- ասել է Թրամփը:
Ասենք, որ Լինիքը հետաքննություն էր սկսել պետքարտուղար Մայք Փոմփեոյի կողմից պաշտոնեական դիրքը չարաշահելու մասին մեղադրանքների հիման վրա:
Դեմոկրատներն այժմ հայտարարում են, թե Թրամփը վրեժխնդիր է լինում պետական այն ծառայողներից, որոնք փորձում են ինչ որ տեղ պատասխանատվության ենթարկել իր վարչակազմին:
Լինիքին պաշտոնից ազատելու մասին հայտարարությունից շատ չանցած, Կոնգրեսի Ներկայացուցիչների պալատի նախագահն էր տեղեկացրել այն մասին, որ Լինիքը սկսել էր հետաքննություն Մայք Փոմփեոյի հարցով: «Պաշտոնից ազատելու այս որոշումը վիրավորական մի քայլ է նախագահի կողմից, որն այսպիսով փորձում է պաշտպանել իրեն հավատարիմ աջակիցներին»,- հայտարարել է դեմոկրատ կոնգրեսական Էլիոթ Էնգելը, որը սակայն հավելյալ մանրամասնություններ չի հայտնել Փոմփեոյի հարցով հետաքննության մասին:
Սակայն Կոնգրեսում աշխատող մի շարք անձինք, ովքեր խնդրել են իրենց անունները չհրապարակել, ասել են, թե Լինիքն ուսումնասիրում էր այն բողոքները, որոնց համաձայն Փոմփեոն հանձնարարել է իրականացնել “անձնական հետաքրքրության հետ կապված առաջադրանքներ»:
