30.08.2026 | 12:31
Վթարային ջրանջատում Քաղաքեռ Զեյթունում
ՀԱՊԿ ԱԳ նախարարների խորհրդի նիստը կանցկացվի մայիսի 26-ին. Ստանիսլավ Զաս
Քաղաքականություն
15.05.2020 | 15:11
ՀԱՊԿ ԱԳ նախարարների խորհրդի նիստը կանցկացվի մայիսի 26-ին, տեսակոնֆերանսի ձևաչափով: ՌԻԱ Նովոստիին տված հարցազրույցում այս մասին ասել է ՀԱՊԿ գլխավոր քարտուղար Ստանիսլավ Զասը:
Օրակարգում կորոնավիրուսի համաճարակի ազդեցությունն է կազմակերպության անդամ պետությունների վրա, ինչպես նաև ՀԱՊԿ դիտորդի և գործընկերոջ կարգավիճակի իրացման ուղղությամբ հետագա քայլերն ու պատմության կեղծման դեմ պայքարը:
«ՀԱՊԿ ԱԳ նախարարների խորհրդի մայիսի 26-ի նիստում կդիտարկվեն նոր իրողությունները, որոնք հիմա համաճարակի ազդեցությամբ գոյություն ունեն ՀԱՊԿ պատասխանատվության գոտում»,- ասել է Զասը:
Նա նշել է, որ անհրաժեշտության դեպքում՝ ՀԱՊԿ-ն իր ամբողջ ներուժով կմիանա կորոնավիրուսի համաճարակի դեմ պայքարին, քանի որ համաճարակը լուրջ սպառնալիք է կազմակերպության անդամ երկրների համար, սակայն առայժմ դրա կարիքը չկա: Զասը տեղեկացրել է նաև, որ կորոնավիրուսի տարածման հետ կապված իրավիճակը հեռախոսազրույցների ընթացքում քննարկել է ՀԱՊԿ անդամ երկրների անվտանգության խորհուրդների քարտուղարների հետ:
Ինչ վերաբերում է այս տարվա սեպտեմբեր-հոկտեմբերին ծրագրված ՀԱՊԿ զորավարժություններին, Ստանիսլավ Զասն ասել է՝ կորոնավիրուսի համաճարակի պատճառով այն չի չեղարկվել:
«Ծրագրված է ՀԱՊԿ երկրների մասնակցությամբ ութ համատեղ զորավարժություն անցկացնել: Բոլորը նախատեսված է սեպտեմբեր-հոկտեմբերին: Ավանդաբար դրանք անցկացվում են այդ ժամանակահատվածում: Առայժմ մենք չենք չեղարկել վարժանքները, նախապատրաստական աշխատանքներն ընթանում են ըստ ժամանակացույցի»,- տեղեկացրել է ՀԱՊԿ գլխավոր քարտուղարը:
