Քաղաքականություն
14.05.2020 | 12:54Շատ դեպքերում մարդկանց մոտ իրոք կարող է կասկած առաջանալ, թե ինչպես է ստացվել, որ ՀՀ վարչապետը տեղեկացված է մարդկանց ունեցած ավանդների մասին, բայց շատ դեպքերում էլ ակնհայտ միտումնավոր փորձ է արվում մեղադրել իշխանություններին օրենք խախտելու մեջ։ Այս մասին այսօր ԱԺ «Իմ քայլը» խմբակցության պատգամավոր Բաբկեն Թունյանն ասաց լրագրողների հետ հանդիպման ժամանակ։
«Երբ վարչապետը հայտարարեց, որ աջակցություն են ստացել մարդիկ, ովքեր ավանդ ունեին 20 մլն դրամից ավելի, կոնկրետ թվեր նշեց, օրինակ՝ 50 կամ 70 հոգի, դա հիմք տվեց ենթադրելու, որ խախտվել է բանկային գաղտնիքը։ Դրա հիման վրա սկսեցին արվել որոշակի հայտարարություններ, որ Հայաստանում բանկային գաղտնիքը պաշտպանված չէ, մեր բանկային համակարգին վստահել չի կարելի և այլն։ Շատ դեպքերում մարդիկ կարող էին իրոք նման կարծիք ունենալ, որ կասկած կարող է լինել, որովհետև մանրամասնորեն չեն տիրապետում ընթացակարգերին, բայց որոշ դեպքերում ամեն ինչն ակնհայտ միտումնավոր էր արվում, որպեսզի մարդկանց մոտ կարծիք առաջանա, թե իշխանությունը զբաղված է կոնկրետ օրենք խախտելով, օրինակ՝ բանկային գաղտնիքի մասին օրենքը»,- նշեց Թունյանը։
Նա ներկայացրեց, թե ինչպես է տեղի ունեցել, որ իմացել են՝ շահառուներից քանիսը ավանդ ունի:
«Յուրաքանչյուր անձի ունեցած ավանդների չափը, ֆինանսների շարժը, վարկերի ծավալը իրոք բանկային գաղտնիք է, և որևէ մեկը չի կարող առանձին անձի վերաբերյալ տվյալներ ունենալ։ Բայց ամփոփ տվյալների մասին պետական մարմինները, լրագրողները կարող են հարցում անել, իմանալ և ստանալ։ Տվյալ պարագայում՝ բանկային համակարգը կարող է ամփոփ տվյալներ պատրաստել և ներկայացնել, թե իրենց միջոցով աջակցություն ստացած շահառուների մեջ քանի հոգի կան, որ ունեն 10 մլն դրամից ավելի ավանդ, 20 մլն դրամից ավանդ և այլն՝ առանց կոնկրետ մարդկանց նույնականացնելու, հաշիվների շարժի մասին տեղեկացնելու: Դա ամփոփ ինֆորմացիա է, որը Կենտրոնական բանկը պարբերաբար հրապարակում է»,- մանրամասնեց պատգամավորը։
Մանրամասները՝ տեսանյութում:
