13.07.2026 | 23:14
ԵՄ-ն պատժամիջոցներ է սահմանել VK-ի նկատմամբ
Հայաստանի 15 քաղաքացիներ մնացել են ռուս-վրացական սահմանի չեզոք գոտում. ՀՀ դեսպանատունը պարզաբանում է տեղի ունեցած միջադեպը
Քաղաքականություն
13.05.2020 | 18:30
Հայաստանի 15 քաղաքացիներ Ռուսաստանից անցել են ռուս-վրացական չեզոք գոտի ու փորձում են հասնել Հայաստան, բայց արտակարգ դրությամբ պայմանավորված՝ դա արգելվում է: Այս մասին Factor.am-ի հետ զրույցում տեղեկացրեց Վրաստանում ՀՀ դեսպանության մամուլի քարտուղար Հարություն Հայրապետյանը՝ մեկնաբանելով վրաց սահմանապահների և ՀՀ քաղաքացիների միջև տեղի ունեցած միջադեպը։
«Դա արգելված է՝ կորոնավիրուսով պայմանավորված: Արտակարգ դրությունից բխող Վրաստանի կառավարության որոշումներն արգելում են օտարերկրյա քաղաքացիների մուտքը երկիր: Ըստ այդմ՝ հնարավոր չէ Վրաստանի տարածքով այս պահին հասնել Հայաստան: Եվ այդ պատճառով, քանի որ դա խաթարում էր վրացական անցակետի բնականոն գործունեությունը, անցակետի ներկայացուցիչները խնդրել են, որպեսզի մեր քաղաքացիներն անցնեն ռուսական կողմ, այսինքն՝ մեկնեն իրենց նախկին բնակության վայրերը։ Այդքանն է եղել»,- նշեց Հայրապետյանը։
Հարցին՝ ինչի՞ մասին էր խոսում քաղաքացին՝ նշելով, որ Վրաստանում ՀՀ դեսպանությունը խոստացել է միջամտել, բայց մի քանի օր է՝ պատասխան չի տրվում, դեսպանատան ներկայացուցիչը պատասխանեց. «Ասել ենք՝ Վրաստանի հետ կբանակցենք, և եթե հնարավոր լինի տեղափոխումն իրականացնել, կիրականացնենք: Բայց այս պահին հնարավոր չէ»։
Հարություն Հայրապետյանի խոսքով՝ ՀՀ 15 քաղաքացիները դեռևս գտնվում են ռուս-վրացական սահմանի չեզոք գոտում, խնդիրը դեռ լուծում չի ստացել։
Հիշեցնենք, որ ավելի վաղ տեսանյութ էր տարածվել, որում նշվում է, թե ռուս-վրացական սահմանին վրացի սահմանապահները հարձակվել են հայերի վրա:
