ՌԴ քննչական կոմիտեն հրաժարվել է մեղմել Խաչատուրյան քույրերի մեղադրանքը

ՌԴ քննչակական կոմիտեն հրաժարվել է մեղմել Խաչատուրյան քույրերի մեղադրանքը և նրանց նրանց գործողությունները չի վերաորակել անհրաժեշտ ինքնապաշտպանություն: Այս մասին ՌԻԱ Նովոստիին հայտնել է հոր սպանության մեջ մեղադրվող Խաչատուրյան քույրերի փաստաբաններից Ալեքսեյ Լիպցերը:

Նա պարզաբանել է, որ ՔԿ-ն անտեսել է Գլխավոր դատախազության հիմնավորումները և հանցանքի որակումը նույնը թողել՝ նախնական դավադրությամբ սպանություն:

Ներկայում պաշտպանական կողմը ծանոթանում է լրացուցիչ հետաքննության նյութերին, մինչև մայիսի վերջ ՔԿ-ն դրանք կփոխանցի Գլխավոր դատախազությանը՝ մեղադրական եզրակացության համար:

Հիշեցնենք՝ ռուսաստանաբնակ Խաչատուրյանների ընտանիքում աղմկահարույց սպանությունը տեղի է ունեցել 2018 թվականի հուլիսին: 57-ամյա Միխայիլ Խաչատուրյանի մարմինը հայտնաբերել էին բազմաթիվ կտրած-ծակած վերքերով: Քննության տվյալներով՝ նրան սպանել են երեք դուստրերը:

Աղջիկների պնդմամբ՝ թմրանյութի ազդեցության տակ գտնվող հայրը դանակով հարձակվել է իրենց վրա, իրենք էլ հարկադրված են եղել պաշտպանվել: Քույրերը պնդում են նաև, որ տևական ժամանակ հայրը ծաղրուծանակի է ենթարկել իրենց: Քննչական մարմինները պարզել են, որ աղջիկները չեն ստել հոր վերաբերմունքի առնչությամբ, այդ թվում՝ սեռական բնույթի ոտնձգության:

Մարիա, Քրիստինա և Անգելինա Խաչատուրյաններն ամբողջությամբ ընդունել են մեղքը: Այնուամենայնիվ, քույրերին մեղադրանք է առաջադրվել նախնական համաձայնությամբ խմբակային սպանության համար: Նրանց 8-20 տարի ժամկետով ազատազրկում է սպառնում: Պաշտպանական կողմն իր հերթին պնդում է, որ տեղի ունեցածն անհրաժեշտ ինքնապաշտպանություն է։