Պարոն վարչապետ, բա դատապարտեցի՞ք մեջքից խփողներին. Մարուքյանը՝ ծեծկռտուքի մասին. ՏԵՍԱՆՅՈՒԹ

Վարչապետն իր ելույթով լեգիտիմացրեց խորհրդարանում տեղի ունեցած բռնությունը և սկսեց մի արշավ, որը միտված է բռնության զոհին դարձնել բռնություն կատարող կամ հիմնական մեղավոր: Խորհրդարանական ճեպազրույցների ժամանակ այս մասին հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով իր և «Իմ քայլից» Սասուն Միքայելյանի մասնակցությամբ միջադեպին:

«Այդ արշավն այսօր էլ չի կանգնել և մեծ թափ է հավաքում: Դրա մեջ կա մի խորքային հանգամանք, որը կրկին քաղաքական է. խորհրդարանում հնչած այլընտրանքային, ընդդիմադիր, քննադատական սուր խոսքը որակել որպես սադրանք և ասել, որ եթե դա սադրանք է, կարելի է բռնություն կիրառել: Եվ երրորդ, որ այդ բռնությունն արդարացված է»,- հավելեց Մարուքյանը:

Նրա խոսքով՝ դա ալիքաձև ազդելու է Հայաստանում ընթացող բոլոր պրոցեսների վրա, մարդկանց խոսքի ազատության՝ ընդդիմադիր, այլընտրանքային խոսքի, և այդ առումով սա մի մեծ պրոցեսի սկիզբ է:

«Բայց դրանով իշխանությունը նաև դրեց իր վերջի սկիզբը, որովհետև այն իշխանությունը, որն արդարացնում է բռնությունը ազատ խոսքի դեմ, այն էլ՝ խորհրդարանում, այդ իշխանությունը չի կարող լավ ապագա ունենալ»,- հայտարարեց ԼՀԿ ղեկավարը:

Մարուքյանն ասաց՝ իրենք էլ տարբեր դեպքերում թույլ են տվել վրիպակներ, ինչի համար ցավում են, բայց այս հարցը քաղաքական է և պետք է քննարկվի՝ քաղաքական և իրավական հետևանքներով:

«Հետո գալու ենք հաջորդ հարցերին. բա, պարո՛ն վարչապետ, որ ելույթ էիք ունենում, դատապարտեցի՞ք մեջքից խփողներին: Ո՛չ: Դատապարտեցի՞ք մեր վրա հարձակվողին: Ո՛չ»,- ասաց Մարուքյանը:

Մանրամասները՝ տեսանյութում: