17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
ԱԱԾ-ում այսօր ջարդ է. Միքայել Մինասյան
Քաղաքականություն
12.05.2020 | 22:34
Երրորդ նախագահ Սերժ Սարգսյանի փեսա Միքայել Մինասյանը շարունակում է խոհանոցից արված տեսանյութեր հրապարակել ֆեյսբուքում՝ անդրադառնալով նոր իշխանությունների գործունեությանը:
«Ստի վերջը 3» վերնագրված տեսանյութում այս անգամ էլ Մինասյանն անդրադարձել է մի քանի թեմաների, բայց առանցքում մաքսանենգ ծխախոտի բեռով Ռուսաստանում կալանավորված օդանավի թեման է: Նրա համոզմամբ՝ այդ պատճառով հիմա Ազգային անվտանգության ծառայությունում ներկայում կադրային զտումներ են:
«Նիկոլ Փաշինյանը, հասկանալով, որ իր իշխանությանը մնացել է շատ քիչ, փորձում է այնպիսի կարողություն դիզել, որն իրեն թույլ կտա պահպանել կյանքի բարձր որակը իշխանությունը կորցնելուց հետո, և դրա համար Հայաստանը ներքաշել է մի այնպիսի միջազգային մաֆիոզական համակարգի մեջ, որն ուղղակի խփում է Հայաստանի հեղինակությանը և աղմուկը դեռ շատ երկար կլսենք: Ես, իհարկե, խոսում եմ հայտնի ծխախոտով լի ինքնաթիռի մասին»,- ասել է նա:
Միքայել Մինասյանի հավաստմամբ՝ Հայաստանի իշխանություններն ամեն ինչ արեցին, որ այդ պատմությունը «ծածկադմփոց անեն»: Նա պնդում է, որ օպերատիվ տվյալներ կան, որ Նիկոլ Փաշինյանն ուղիղ կապ ունի այս պատմության հետ, իսկ դրան առնչություն ունեն նաև Սիփան Փաշինյանը, Հրաչյա Հակոբյանը, Աննա Հակոբյանն ու ՊԵԿ նախագահի տեղակալ Շուշանիկ Ներսիսյանը:
«Սիփան Փաշինյանը, որը Նիկոլ Փաշինյանի եղբորորդինի է, կազմակերպում է Հայաստանում այդ բիզնեսը, գնում է ծխախոտի այդ քանակը և որոշում է արտահանել, որովհետև ունեն հնարավորություն՝ դա վաճառելու Ռուսաստանում: Ի դեպ՝ ինչ ասում եմ, ռուսական հատուկ ծառայություններն ունեն դրա փաստերը, և նաև Հայաստանի հատուկ ծառայությունները ունեն դրա փաստերը, եթե արդեն չեն ոչնչացրել, որովհետև արդեն 20-25 օր է՝ Հայաստանի իշխանությունները զբաղված են հետքերի ոչնչացմամբ»,- պնդում է Մինասյանը:
Նրա խոսքով՝ ռուսական կողմն օդանավի պարունակության մասին տեղեկացել է Հայաստանի ԱԱԾ-ից, որովհետև «կոլեգաների միջև կան պայմանավորվածություններ և պայմանագրեր՝ օպերատիվ տվյալների փոխանակման մասին»:
«Հայաստանցիները հայտնում են կոլեգաներին, Նիկոլ Փաշինյանը հայտնվում է շատ անհարմար վիճակում, որից հետո սկսվում է ջարդ: ԱԱԾ-ում այսօր ջարդ է, ավելի քան 20 բարձրաստիճան սպա, որոնք չգիտեն, որ իրենք բացի ռեպրեսիաներից՝ նաև պետք է սպասարկեն Նիկոլ Փաշինյանի ընտանեկան բիզնեսները, դիմումները գրում են և հիմա նաև ուրիշ գործերով ենթարկվում են քրեական հետապնդումների»,- պնդում է Միքայել Մինասյանը:
Նույն տեսանյութում Մինասյանը պնդում է նաև, որ Նիկոլ Փաշինյանը պոպուլիստ չէ, ներկայացնում է իր տեսակետի վերլուծությունը և պնդում, որ նա պետական օլիգարխ է:
