Խորհրդարանական ընդդիմությունն ավելի շատ պաշտպանության կարիք ունի, քան իշխանությունը․ պետք է ընդունենք․ Վլադիմիր Վարդանյան. ՏԵՍԱՆՅՈՒԹ

Այսօր Ազգային ժողովում «Իմ քայլը» խմբակցության պատգամավոր Վլադիմիր Վարդանյանը, ելույթ ունենալով խմբակցության անունից, նշեց, որ պետք է ընդունել, որ կան խոցելի խմբեր, և նրանք ՄԻՊ-ի կողմից ավելի շատ ունեն պաշտպանության կարիք։

«Այո՛, Մարդու իրավունքների պաշտպանը պետք է պաշտպանի բոլորիս իրավունքները, բայց մենք ընդունում ենք, չէ՞, որ հասարակության մեջ կան խոցելի խմբեր, իրավիճակներ, երբ ՄԻՊ դերակատարությունը շատ ավելի կարևոր է և այդ հարցերի վրա կենտրոնացումը չի նսեմացնում այն դերակատարությունը, որ վերջինս պետք է ունենա։ Դրական խտրականությունը չի քննադատվում և չպետք է քննադատվի։ Այո, մենք պետք է ընդունենք, որ խորհրդարանական ընդդիմությունը շատ ավելի պաշտպանության կարիք ունի, քան խորհրդարանական իշխանությունը, որովհետև մենք էլ ենք եղել ընդդիմություն, մենք էլ ենք տեսել ինչպես են վերաբերվում ավտորիտար պետություններում ընդդիմությանը և չենք ուզում, որ այդ իրավիճակը կրկնվի։ Հավատացնում եմ ձեզ, հեղափոխության թեժ օրերին ՄԻՊ Արման Թաթոյանը և գրասենյակը նույն ձև և շատ ակտիվ աշխատում էին, ՄԻՊ-ն այցելում էր այն ժամանակվա դեռ ընդդիմությանը՝ ներառյալ այն անձանց, որոնք այդ օրերին ապօրինաբար զրկվեցին ազատությունից»,- նշեց պատգամավորը։

Նշենք, որ ընդդիմությանը պաշտպանելու, իսկ իշխանության նկատմամբ կատարված « հոգեբանական բռնության»-ը որևէ կերպ չարձագանքելու վերաբերյալ քննադատություններ էին հնչեցրել հենց նույն խմբակցության մի քանի պատգամավորներ։

Մանրամասները՝ տեսանյութում։