30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Պուտինը հայտարարել է ՌԴ-ում ոչ աշխատանքային օրերի ռեժիմի ավարտի մասին
Քաղաքականություն
11.05.2020 | 18:44
ՌԴ նախագահ Վլադիմիր Պուտինը հայտարարել է, որ մայիսի 11-ին լրացավ ոչ աշխատանքային օրերի ժամկետը: Այդ ռեժիմից, սակայն, երկիրը պետք է դուրս գա՝ խստորեն հետևելով սանիտարական պահանջներին: ՏԱՍՍ-ի փոխանցմամբ՝ Պուտինն այս մասին ասել է երկրում համաճարակային իրավիճակին նվիրված խորհրդակցության ժամանակ:
Պուտինը նշել է, որ համաճարակի դեմ պայքարը շարունակվելու է՝ հավելելով, որ ավելի վաղ ընդունված միջոցառումները թույլ կտան անցնել պայքարի հաջորդ փուլին՝ «սահմանափակումների ռեժիմից փուլային ելքին»:
«Սահմանափակումների ռեժիմի մեղմացումը կամ դրանից դուրս գալը պետք է լինի բոլոր պայմաններին և սանիտարական պահանջներին խստորեն հետևելով, որոնք երաշխավորում են մարդկանց անվտանգությունը: Արդեն ընդունված միջոցառումների շնորհիվ արդեն հազարավոր կյանքեր են պահպանվել, և այս գործում, իհարկե, վճռորոշ դեր ունեն բժիշկները, բուժքույրերը»,- ասել է ՌԴ նախագահը:
Միաժամանակ, երկրում կշարունակեն սահմանափակումներ գործել 65 տարեկանից բարձր անձանց, ինչպես նաև քրոնիկ հիվանդություններ ունեցողների համար:
ՌԴ նախագահը կառավարությանն ու Դաշնության սուբյեկտների ղեկավարներին հանձնարարել է ապահովել որոշակի միջոցառումների նկատմամբ վերահսկողությունը:
«Բնականաբար, ամբողջ երկրում առայժմ բացառվում են ցանկացած զանգվածային միջոցառումները, հարկավոր է խստորեն հետևել սանիտարական կանոններին»,- ընդգծել է Պուտինը՝ նշելով, որ դա վերաբերում է կազմակերպություններին, ձեռնարկություններին, խանութներին, տրանսպորտին, ծառայությունների ոլորտին:
Հիշեցնենք, որ մայիսի 11-ի դրությամբ՝ Ռուսաստանում կորոնավիրուսով վարակվածների թիվը հասել է 221.344-ի: Այս ցուցանիշով ՌԴ-ն աշխարհում 3-րդ տեղում է հայտնվել՝ առաջ անցնելով Մեծ Բրիտանիայից (220.400) և Իտալիայից (219.000):
