12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
ՀՀ նախագահը պատմել է լեգենդար հետախույզներ, Խորհրդային Միության հերոս Գևորգ Վարդանյանի և նրա տիկնոջ՝ Գոհար Վարդանյանի մասին
09.05.2020 | 11:11
Հայրենական մեծ պատերազմում տարած հաղթանակի 75-ամյակին ընդառաջ՝ Հանրապետության նախագահ Արմեն Սարգսյանը պատմել է լեգենդար հետախույզներ, Խորհրդային Միության հերոս Գևորգ Վարդանյանի և նրա տիկնոջ՝ Գոհար Վարդանյանի մասին, անդրադարձել նրանց հետ իր վաղեմի բարեկամությանը, հանդիպումներից ու զրույցներից ստացած տպավորություններին:
«Ես բախտ եմ ունեցել անձնապես ճանաչելու Գոհար և Գևորգ Վարդանյաններին, մենք բարեկամներ ենք,-իր խոսքում ասել է Հանրապետության նախագահը: -Մայրս և Գոհարը երկար տարիների ընկերուհիներ էին: Նրանց ընկերությունը սկսվել էր դեռևս Թեհրանից»:
Բարձր գնահատելով լեգենդար հետախույզների գործունեությունը և վաստակը՝ նախագահն ասել է, որ նրանց կյանքը, որն օբյեկտիվ պատճառներով այնքան էլ հրապարակային չէր, գեղեցիկ և հերոսական պատմություն էր, որ լեցուն էր այնպիսի իրական դրվագներով, որոնք երբեմն աներևակայելի էին:
«Հայերը կարող են լինել ոչ միայն փայլուն գիտնականներ, քաղաքական գործիչներ, գործարարներ, այլև՝ աշխարհի լավագույն հետախույզները: Գոհար և Գևորգ Վարդանյաններն ապացուցել են դա,-նշել է Արմեն Սարգսյանը:-Նրանք լավագույն օրինակ են, թե ինչ է նշանակում հայրենիքին ծառայելը, հայրենիքից հեռու ապրելով՝ հայրենիքը սիրելը և երբեք հայրենիքը չմոռանալը, ինչ է նշանակում Հայաստանում այնքան էլ երկար չլինելով՝ Հայաստանն այդքան շատ սիրելն ու հայ մնալը: Հայ-ռուսական հարաբերությունները միշտ էլ կառուցվել են ոչ միայն ընդհանուր մարդկային, պատմական հարաբերությունների, պատմության, այլև առանձին անհատների կյանքի պատմության վրա՝ լինի այդ անհատը Հովհաննես Այվազովսկին, թե Հովհաննես Բաղրամյանը, Վիկտոր Համբարձումյանը, թե Գևորգ և Գոհար Վարդանյանները»:
Նախագահ Սարգսյանի առաջարկությամբ լեգենդար հետախույզների կյանքի և գործունեության մասին խոսել է նաև Ռուսաստանի արտաքին հետախուզության ծառայության տնօրեն Սերգեյ Նարիշկինը՝ ընդգծելով ոչ միայն նրանց բարձր պրոֆեսիոնալիզմը, այլև մարդկային լուսավոր կերպարը:
