17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Թբիլիսին Կիևից հետ է կանչել իր դեսպանին՝ Սաակաշվիլիին Ուկրաինայում բարձր պաշտոնի նշանակելու պատճառով
Քաղաքականություն
08.05.2020 | 15:16
Թբիլիսին խորհրդակցությունների համար հետ է կանչել Կիևում իր դեսպանին՝ կապված Վրաստանի նախկին նախագահ Միխայիլ Սաակաշվիլիին Ուկրանիայում բարձր պաշտոնի նշանակելու հետ: «Sputnik Georgia»-ի փոխանցմամբ՝ այս մասին հայտարարել է Վրաստանի ԱԳ նախարար Դավիթ Զալկալիանին:
Նշենք, որ նախօրեին հայտնի դարձավ, որ Ուկրաինայի նախագահը Սաակաշվիլիին նշանակել է երկրի բարեփոխումների ազգային խորհրդի գործադիր կոմիտեի ղեկավարի պաշտոնում՝ չնայած Վրաստանի իշխանությունների հայտարարություններին, որ Թբիլիսիի համար անընդունելի է Սաակաշվիլիին Ուկրաինայում ցանկացած պաշտոնի նշանակումը:
«Ռազմավարական գործընկերոջ կողմից նման պաշտոնի նշանակումը մի մարդու, որը հետախուզվում է վրացական դատական համակարգի կողմից, հարցեր է առաջացնում: Դա Ուկրաինայում Վրաստանի արտակարգ և լիազոր դեսպան Թեյմուրազ Շարաշենիձեին խորհրդակցությունների համար Թբիլիսի կանչելու առիթ է դարձել»,- ասել է Զալկալիանին:
Նա, սակայն, նշել է, որ չնայած ուկրաինական իշխանությունների որոշմանը՝ երկու երկրների միջև դիվանագիտական հարաբերությունները խզելու կամ ռազմավարական գործընկերությունը վերանայելու հարց չի դիտարկվում: Ըստ նախարարի՝ Վրաստանի կառավարությունը հետագա քայլերի մասին որոշում կկայացնի, որպեսզի ստեղծված իրավիճակը բացասաբար չանդրադառնա երկկողմ հարաբերությունների, տարբեր միջազգային կազմակերպություններում համագործակցության վրա:
Միխայիլ Սաակաշվիլին, հիշեցնենք, Վրաստանի նախագահի պաշտոնը զբաղեցրել է 2004-2013 թվականներին: Ընտրություններում նրա «Միացյալ ազգային շարժում» կուսակցության պարտությունից և նախագահի լիազորությունների ժամկետի ավարտից հետո Սաակաշվիլին հեռացավ Վրաստանից, իսկ 2015 թվականին Ուկրաինայի նախագահ Պյոտր Պորոշենկոն նրան ուկրաինական քաղաքացիություն տվեց և Օդեսայի նահանգապետ նշանակեց: Այլ երկրի քաղաքացիություն և պաշտոն ստանալուց հետո Սաակաշվիլին մեխանիկորեն զրկվեց Վրաստանի քաղաքացիությունից: Այստեղ նաև նախկին նախագահի դեմ քրեական գործեր հարուցվեցին:
Ներկայում Սաակաշվիլին հեռակա կարգով 6 տարի ժամկետով ազատազրկման է դատապարտված, դատարանում նրա դեմ ևս մի քանի գործ է քննվում:
