18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Թրամփը վետո է դրել Իրանի դեմ ռազմական ուժ կիրառելու վերաբերյալ բանաձևի վրա
Քաղաքականություն
07.05.2020 | 19:22
ԱՄՆ նախագահ Դոնալդ Թրամփը վետո է դրել Իրանի դեմ ռազմական ուժ կիրառելու հարցում իր լիազորությունները սահմանափակելու վերաբերյալ Կոնգրեսի բանաձևի վրա: Թրամփի վարչակազմը փաստաթուղթը վիրավորական է որակել նախագահի ինստիտուտի համար, գրում է DW-ի ռուսական ծառայությունը:
Բանաձևը Ներկայացուցիչների պալատում ներկայացվել է այն բանից հետո, երբ հունվարի 3-ին Թրամփի հրամանով Իրաքում սպանվեց Իսլամական հեղափոխության պահապանների կորպուսի «Ալ Ղուդս» ստորաբաժանման հրամանատար Ղասեմ Սոլեյմանիին:
«Չնայած նրան, ինչ գրված է բանաձևում, ԱՄՆ-ն ներկայում ուժ չի կիրառում Իրանի նկատմամբ: Մենք ապրում ենք սպառնալիքներով թշնամական աշխարհում, և ԱՄՆ Սահմանադրությունն ընդունում է, որ նախագահը պետք է ի վիճակի լինի կանխատեսել մեր մրցակիցների հետագա քայլերն ու արագ և վճռական պատասխան քայլեր ձեռնարկի: Հենց դա էլ ես արել եմ»,- վստահեցրել է Թրամփը:
Ինչ վերաբերում է Իրանին վերաբերող բանաձևին՝ մարտին այն սատարել է Ներկայացուցիչների պալատի անդամների մեծամասնսությունը, իսկ մինչ այդ՝ փետրվարին, հավանության է արժանացել Սենատի կողմից, որտեղ մեծամասնություն են կազմում հանրապետականները:
Փաստաթուղթը նախագահին պարտավորեցնում է Իրանի դեմ ռազմական գործողություններ սկսելուց առաջ ստանալ Կոնգրեսի թույլտվությունը: Իսկ եթե ռազմական գործողություններն արդեն սկսվել են, ապա ԱՄՆ վարչակազմը պետք է 30 օրվա ընթացքում դադարեցնի դրանք՝ մինչև օրենսդիրների համաձայնությունը ստանալը:
