26.09.2026 | 20:38
Քաղաքացին ընկել է ջրհորը. նա հոսպիտալացվել է
Իրանը չի ընդունի ՄԱԿ-ի ԱԽ 2231 բանաձևի խախտումը. Ռոհանին՝ զենքի մատակարարման արգելքին պատասխանի մասին
Քաղաքականություն
06.05.2020 | 17:49
Զենքի մատակարարման էմբարգոյի չեղարկումը միջուկային գործարքի անքակտելի մասն է, և ԱՄՆ-ն ու մյուս երկրները պետք է իմանան, որ Իրանը չի ընդունի ՄԱԿ-ի Անվտանգության խորհրդի 2231 բանաձևի խախտումը: Այս մասին հայտարարել է ԻԻՀ նախագահ Հասան Ռոհանին, գրում է ԻՌՆԱ-ն:
Նրա խոսքով՝ զենքի մատակարարման արգելքի ժամկետի երկարաձգման դեպքում Իրանի արձագանքը լուրջ հետևանքներ կունենա:
«Ամերիկացիները 2018 թվականի մայիսի 8-ին հիմարություն արեցին՝ ներքին ծայրահեղականների, Իսրայելի և Սաուդյան Արաբիայի ճնշման ու Թրամփի համառության շնորհիվ: Թրամփը միակողմանի հրաժարվեց միջուկային գործարքից»,- ասել է նա:
Ռոհանիի խոսքով՝ համաձայնագրի մյուս մասնակիցները նույնպես գրեթե չեն կատարում իրենց պարտավորությունները: «Հիմա մենք հավասարակշռության վիճակում ենք: Երբ նրանք ցանկանան ամբողջական ծավալով կատարել իրենց պարտավորությունները, մենք նույն օրն իսկ կվերադառնանք մեր պարտավորությունների կատարմանը»,- ասել է Իրանի նախագահը:
Նա հիշեցրել է, որ միջուկային գործարքը երկու փուլ ունի. «Դրանցից մեկը 5-ամյա շրջանն է, երբ չեղարկվելու է զենքի մատակարարման էմբարգոն, մյուսը՝ 8-ամյա և 10-ամյա շրջանը, երբ բոլոր սահմանափակումները պետք է վերացվեն: Հիմա մենք հասել ենք առաջին փուլին, երբ զենքի մատակարարման էմբարգոն պետք է վերացվի»:
«Լավագույն տարբերակը կլինի, եթե ԱՄՆ-ն վերադառնա միջուկային գործարքին, ներողություն խնդրի իրանցի ժողովրդից և տուգանք վճարի»,- հավելել է Հասան Ռոհանին:
Նշենք, որ ավելի վաղ ՌԴ ԱԳ փոխնախարար Սերգեյ Ռյաբկովը հայտարարել էր, որ Իրանին զենքի և ռազմական տեխնիկայի մատակարարման հատուկ ռեժիմի հնգամյա ժամկետը մոտենում է ավարտին, և այդ որոշումից շեղում լինել չի կարող: ԱՄՆ պետքարտուղար Մայք Պոմպեոն էլ իր հերթին նշել է, որ Վաշինգտոնն ամեն ինչ կանի՝ զենքի մատակարարման էմբարգոն երկարաձգելու և թույլ չտալու համար, որ Թեհրանը զենք գնի Ռուսաստանից կամ Չինաստանից:
