11.12.2025 | 23:40
Կոնֆերենցիաների լիգա․ «Նոան» հաղթեց «Լեգիային» ու մոտ է փլեյ-օֆֆի ուղեգրին
Նախադպրոցական կրթության ոլորտը կարգավորող նախագիծը ԱԺ-ն ընդունեց ամբողջությամբ
Քաղաքականություն
06.05.2020 | 11:10
Ազգային ժողովը երկրորդ ընթերցմամբ և ամբողջությամբ ընդունեց կառավարության ներկայացրած օրենքի նախագիծը, որով կարգավորվում են նախադպրոցական ուսումնական հաստատությունների գործունեության վերաբերյալ մի շարք հարցեր։
«Նախադպրոցական կրթության մասին» Հայաստանի Հանրապետության օրենքում փոփոխություն կատարելու մասին օրենքի նախագիծն ԱԺ նիստում ստացավ 116 «կողմ» ձայն:
Ըստ ԿԳՄՍ նախարար Արայիկ Հարությունյանի, այս նախագծով «հեղափոխական մոտեցում է ցուցաբերվում նախադպրոցական կրթության ոլորտի համար։
«Նախադպրոցական կրթության բնագավառում պետական քաղաքականությունը և պետական քաղաքականության սկզբունքներն են սահմանվել, տարանջատվել են նախադպրոցական կրթության նպատակները, խնդիրները: Մասնավորապես, որպես խնդիր ավելացվել է նախադպրոցական կրթության հանրային նշանակության բարձրացումն ու որակի բարձրացումը, որակյալ նախադպրոցական կրթություն տրամադրելու հավասար հնարավորությունների, ներառականության և մատչելիության ապահովումը՝ խելամիտ հարմարեցումների միջոցով և այլն: Ամրագրվել են նախադպրոցական ուսումնական հաստատություն ընդունվելու առաջնահերթության իրավունքից օգտվող խմբերը՝ առաջին կամ երկրորդ կարգի հաշմանդամություն, երեք կամ ավելի երեխա ունեցող, կամ զինծառայողի ծնողների երեխաները»,- ասաց նախարարը:
Կարգավորվելու է նաև զարգացման կենտրոնների պարտադիր լիցենզավորման հարցը:
