24.04.2026 | 23:32
Կապանում ջրանջատում կլինի
Մայք Պոմպեոն Չինաստանին մեղադրել է կորոնավիրուսի մասին տվյալները թաքցնելու համար
Քաղաքականություն
04.05.2020 | 14:31
Չինաստանի Կոմունիստական կուսակցությունն ամեն ինչ արեց, որպեսզի աշխարհը ժամանակին չիմանա SARS-CoV-2 կորոնավիրուսի մասին: Ամերիկյան ABC News-ին տված հարցազրույցում այս մասին հայտարարել է ԱՄՆ պետքարտուղար Մայք Պոմպեոն, հաղորդում է DW-ի ռուսական ծառայությունը:
Նրա խոսքով՝ պաշտոնական Պեկինն իրեն դրսևորեց ավտորիտար ռեժիմների նման՝ թաքցնելով տեղեկությունը, մոլորեցնելով և ԱՀԿ-ն որպես գործիք օգտագործելով:
«Սակայն ԱՄՆ նախագահ Դոնալդ Թրամփը հստակ հասկացրեց, որ Վաշինգտոնը պատրաստվում է մեղավորներին պատասխանատվության կանչել»,- ընդգծել է Պոմպեոն:
Ամերիկացի պաշտոնյան նշել է, որ չինական լաբորատորիաները չեն համապատասխանում ստանդարտներին՝ հավելելով, որ առաջին անգամ չէ, որ այդ լաբորատորիաներում սխալների արդյունքում աշխարհը խոցելի է դառնում վիրուսների համար:
Նա հիշեցրել է, որ ո՛չ ամերիկյան փորձագետներին, ո՛չ ԱՀԿ-ի խմբին չի հաջողվել չինական Ուհանի վիրուսաբանության ինստիտուտի լաբորատորիա մտնել: «Մենք դեռևս վիրուսի անհրաժեշտ նմուշներ չունենք»,- հավելել է Պոմպեոն:
Հիշեցնենք, որ վերջին տվյալներով՝ նոր կորոնավիրուսով վարակվածների թիվն աշխարհում գերազանցել է 3.5 միլիոնը: Համաճարակի հետևանքով ավելի քան 240 հազար մարդ է մահացել: Վարակվածների և մահացության ցուցանիշով առաջին տեղում ԱՄՆ-ն է:
