Ուկրաինայի հետ երկխոսելու բարդույթ չունենք, օտար չենք միմյանց. ՀՀ արտգործնախարար. ՏԵՍԱՆՅՈՒԹ

ԱԺ արտաքին հարաբերությունների մշտական հանձնաժողովի այսօրվա նիստում պատգամավոր Արման Բաբաջանյանը մի շարք հարցեր ուղղեց ԱԳ նախարար Զոհրաբ Մնացականյանին՝ կապված երկրի արտաքին քաղաքականության հետ, մասնավորապես՝ Վրաստանի, Իրանի, ՌԴ-ի և Ուկրաինայի ուղղությունների վերաբերյալ:

Անդրադառնալով հայ-ռուսական հարաբերություններին՝ Զոհրաբ Մնացականյանն ասաց՝ մեր մոտեցումը շատ հստակ է. Ռուսաստանը Հայաստանի ռազմավարական գործընկերն է: «Ռուսաստանի հետ օրակարգը ձևավորվել է տարիներ, տասնամյակներ շարունակ, ունի լուրջ հիմքեր և բավական ծավալուն օրակարգ: Մեր կառավարությունն առավել քան հստակ և հետևողական է եղել, որ Հայաստանի համար ՌԴ-ի հետ հարաբերությունները եղել և մնում են կարևոր, ռազմավարական նշանակություն ունեցող, դաշնակցային, և մենք այդ ոգով շարունակում ենք աշխատել ՌԴ-ի մեր գործընկերների հետ»,- հավելեց նա:

Զոհրաբ Մնացականյանը բնական է համարում, որ հարաբերություններում հարցեր կան. «Եթե մենք չունենք հարցեր, ուրեմն՝ լուրջ խնդիր կա»:

Ինչ վերաբերում է Ուկրաինային, ըստ ԱԳ նախարարի՝ Երևանը երբևէ բարդույթ չի ունեցել Կիևի հետ խոսելու, բայց, միաժամանակ, լուրջ մտահոգություններ ենք ունեցել՝ կապված Ուկրաինայի որոշ դիրքորոշումների հետ:

«Որևէ գաղտնիք չէ եղել այդ առումով: Մեր մոտեցումն այն է, որ երկխոսելը միակ ճանապարհն է, և մենք բարդույթ չունենք երկխոսելու և շարունակելու գտնել այն ճանապարհը, որը մեզ հնարավորություն կտա զսպելու և չեզոքացնելու այն հարցերը, որոնք մեր երկկողմ հարաբերություններում ի հայտ են եկել»,- ասաց Մնացականյանը:

Մանրամասները՝ տեսանյութում: