03.05.2024 | 15:51
Բլինքենն ուշադիր հետևում է Վրաստանում տեղի ունեցող իրադարձություններին․ Միլլեր
Պաշտպանության և անվտանգության հարցերի հանձնաժողովի նիստը չկայացավ. ՀՀԿ-ն որոշել է մերժել Վիգեն Սարգսյանի առաջարկները
10.11.2017 | 19:48
Ազգային ժողովի Պաշտպանության և անվտանգության հարցերի մշտական հանձնաժողովի նիստը, որը նշանակված էր այսօր ժամը 18:00-ին, չկայացավ: Հանձնաժողովի անդամ, ՀՀԿ-ական Ալիկ Սարգսյանը հայտնեց, որ նիստը հետաձգվում է քվորում չլինելու պատճառով: Նշենք, որ նիստի օրակարգում ընդգրկված էին Պաշտպանության նախարարության ներկայացրած օրինագծերը, ինչպես նաև Ազգային ժողովի բոլոր խմբակցությունների պատգամավորների մշակած «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքը:
Այս օրենքի հետ կապված խնդրահարույց փոփոխություններ էր առաջարկել Պաշտպանության նախարարությունը: Մասնավորապես՝ առաջարկվում էր 27 տարին լրացած, զինծառայությունից խուսափած քաղաքացիների համար ֆինանսական փոխհատուցումը վերացնել և նրանց նկատմամբ քրեական հետապնդում իրականացնել:
Factor-ի հետ զրույցում ԱԺ ՀՀԿ խմբակցության պատգամավոր Կարինե Աճեմյանը, սակայն, հայտնեց, որ նախարարության առաջարկները մերժվել են և լրամշակված տարբերակում չկան: Հավելենք, որ այդ ընթացքում Աժ դարպասների մոտ բողոքի ակցիա էին իրականացնում դասադուլ հայտարարած ուսանողները, որոնք տեղեկանալով նիստի հետաձգման մասին՝ ոգևորված նշեցին, որ դա նաեւ իրենց բողոքի ակցիայի արդյունքում էր:
Պաշտպանության և անվտանգության հարցերի մշտական հանձնաժողովի նիստը կկայանա երկուշաբթի օրը ժամը 11:00-ին նույն օրակարգով:
