Վլադիմիր Պուտինը՝ ԽՍՀՄ հնարավոր վերածննդի և ԵՏՄ-ի ընդլայնման մասին

Նախկին խորհրդային երկրների համատեղ ջանքերն օգտակար են բոլորի համար՝ չնայած անցյալի վախերին և ԽՍՀՄ-ի հնարավոր վերածննդի շուրջ մտավախություններին։ Զգալով այս առավելությունները, իսկ դրանք զգում են այս գործընթացի բոլոր մասնակիցները, մենք նոր քայլեր ենք ձեռնարկում և առաջ շարժվում։ Այս մասին հայտարարել է ՌԴ նախագահ Վլադիմիր Պուտինը, հաղորդում է ՌԻԱ Նովոստին։

Աղբյուրի փոխանցմամբ՝ Պուտինն այս հայտարարություններն արել է դեռ հոկտեմբերին, սակայն դրանք միայն հիմա են հրապարակվել։

Ռուսաստանի նախագահի կարծիքով՝ նախկին ԽՍՀՄ պետությունների դեպքում մրցունակության մակարդակը միավորվելու միջոցով բարձրացնելը բնական է: Պուտինը հիշեցրել է, որ նշված բոլոր երկրների բնակիչները խոսում են ռուսերեն, ինչպես նաև ունեն ընդհանուր ենթակառուցվածք:

«Սա ինտեգրման ևս մեկ մեծ առավելություն է», – ասել է նա:

Անդրադառնալով ԵՏՄ-ին՝ ՌԴ նախագահը նշել է, որ միության հետ երկխոսությանն արևմտյան գործընկերների դիմադրությունը բացատրվում է մրցակցության վախով։

«Սա ոչ թե պատերազմական կամ քաղաքական, այլ տնտեսական միություն է։ Իսկ մենք դա ուզում ենք, քանի որ այն մեր ժողովուրդնեերի բարեկեցության բարելավման ճանապարհն է»,- ընդծել է ՌԴ նախագահը։

Պուտինը նաև նշել է, թե ինչու ԵՏՄ-ն չի շտապում նոր անդամների ընդունել։ Ըստ նրա՝ դա արվում է՝ հաշվի առնելով այլ տարածաշրջաններում ինտեգրացիոն գործընթացների փորձը։

«ԵՏՄ անդամ երկրների ընդլայնման գործընթացում չի կարելի որոշակի փուլեր շրջանցել։ Տեսնում ենք, թե ինտեգրացիոն գործընթացներն ինչպես են զարգանում աշխարհի այլ շրջաններում։ Օրինակ՝ Եվրոպայում շատ դժվարություններ են եղել։ Հետևաբար, անհրաժեշտ է աստիճանաբար առաջ շարժվել ՝ առանց շտապելու», – ասել է ՌԴ նախագահը։

Նելլի Մելքոնյան