30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
ԱՀԿ ղեկավարն ափսոսանք է հայտնել ԱՄՆ-ի կողմից ֆինանսավորումը դադարեցնելուն. Reuters
Քաղաքականություն
16.04.2020 | 11:50
Առողջապահության համաշխարհային կազմակերպության տնօրեն Թեդրոս Գեբրեյեսուսն ափսոսանքով է ընդունել կազմակերպության ֆինանսավորումը դադարեցնելու վերաբերյալ ԱՄՆ նախագահ Դոնալդ Թրամփի որոշումը: Այս մասին է հայտնում է Reuters-ը:
Գեբրեյեսուսը նշել է, որ ԱՄՆ-ն կազմակերպության վաղեմի և առատաձեռն ընկերն է եղել, և հույս է հայտնել, որ այդպես էլ կշարունակվի:
«Առողջապահության համաշխարհային կազմակերպությունը վերլուծելու է այն ազդեցությունը, որ կարող է ունենալ ԱՄՆ ֆինանսավորման դադարեցումը, և գործընկերների հետ լրացնելու է ստեղծված ֆինանսական բացերը՝ համոզվելու համար, որ աշխատանքն անխափան ձևով կշարունակվի: Այս պահին մեր հիմնական խնդիրը վիրուսը դադարեցնելն է և կյանքեր փրկելը: ԱՀԿ-ն շնորհակալ է այն բազմաթիվ երկրներին, կազմակերպություններին և անհատներին, որոնք իրենց աջակցությունն են հայտնել մեզ»,- ասել է ԱՀԿ ղեկավարը:
«Մայքրոսոֆթ» ընկերության հիմնադիր Բիլ Գեյթսը, արձագանքելով թեմային, ասել է. «Համաշխարհային առողջապահական ճգնաժամի ընթացքում Առողջապահության համաշխարհային կազմակերպության ֆինանսավորումը դադարեցնելը վտանգավոր է: Աշխարհն այժմ ավելի քան երբևէ ԱՀԿ-ի կարիքն ունի»:
Հիշեցնենք՝ նախորդ շաբաթ իր ճեպազրույցներից մեկում Դոնալդ Թրամփը հայտարարել էր, որ ԱՀԿ-ն չինաստանամետ քաղաքականություն է վարում, ինչի պատճառով ԱՄՆ-ն մտադիր է կրճատել կամ դադարեցնել կազմակերպությանը տրվող ֆինանսավորումը։ Ավելի ուշ՝ կորոնավիրուսային համավարակի թեմայով հերթական ճեպազրույցի ժամանակ ԱՄՆ նախագահը հայտարարել էր, թե իր աշխատակազմին հանձնարարել է դադարեցնել Առողջապահության համաշխարհային կազմակերպության ֆինանսավորումը։ Նա նաև նշել էր, որ իրականացվելու է 60-90 օր տևողությամբ հետաքննություն՝ պարզելու ԱՀԿ թույլ տված չարաշահումները։
Նելլի Մելքոնյան
