24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Ակտիվ ուսանողներին սպառնացել են ձերբակալմամբ. ԵՊՀ դասախոսն ահազանգում է
Հասարակություն
08.11.2017 | 18:14
Երևանի պետական համալսարանի դասախոս Յուլյա Անտոնյանը ֆեյսբուքյան իր էջում գրառում է կատարել՝ պնդելով, որ համալսարանում դասախոսների նկատմամբ փորձում են ճնշումներ գործադրել:
«Այսօր ԵՊՀ-ի պրոռեկտորը հրաման արձակեց, որով արգելում է ԵՊՀ-ի դասախոսներին հրապարակավ արտահայտվել բանակին և տարեկետման վերաբերող հարցերի շուրջ: Անկախ նրանից, թե որն է իմ անձնական կարծիքը այդ հարցերում, ես համարում եմ, որ դա մեր ու, մասնավորապես, իմ մարդկային ու սահմանադրական իրավունքների խախտումն է: Ո՛չ պրոռեկտորը, ո՛չ ռեկտորը, ո՛չ էլ հանրապետության նախագահը որևէ իրավունք չունեն նման հրամաններ տալու: Հավելեմ նաև, որ ակտիվ ուսանողներին սպառնացել են ձերբակալմամբ: Այսպիսով իր լուման մտցնելով ստալինյան բռնաճնշումների 80-ամյակը «տոնելու» գործում»,- գրել է դասախոսը, ապա երկու հետգրություն ավելացրել.
«P.S. Ինձ խնդրեցին ուղղել, որ դա պրոռեկտորի հրաման չէր, այլ ներքին կարգադրություն, կամ անգամ խնդրանք: Ինչը իրականում շատ բան չի փոխում ու ցույց է տալիս, թե որքանով է համալսարանը իրականում ճնշված քաղաքական իշխանությունների կողմից:
P.P.S. Ինչպես հասկացա, համալսարանում արդեն անհանգստացած են այդ պոստով: Ես նրանց հասկանում եմ, բայց նաև խնդրում եմ հասկանալ ինձ: Եթե այսօր «ներքին խնդրանքներին», փակ դռներին չարձագանքենք, վաղը կսկսվեն աշխատանքից ազատումներ, ձերբակալումներ և այլն: Ես անհանգստացած եմ իմ և իմ կոլեգաների վաղվա օրվա մասին, մեր դասախոսական, գիտական և քաղաքացիական ճակատագրի մասին»:
Նշենք, որ Factor.am-ը փորձեց կապ հասատատել Յուլյա Անտոնյանի հետ, սակայն չհաջողվեց:
