30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Չեռնոբիլի ատոմակայանի մեկուսացման գոտում բռնկված հրդեհը մարվել է. Ուկրաինայի ԱԻՊԾ պետ
Քաղաքականություն
14.04.2020 | 20:06
Չեռնոբիլի ատոմակայանի մեկուսացման գոտում և դրա շուրջ բռնկված հրդեհից հետո մխացող կրակը մարելու համար Ուկրաինայի արտակարգ իրավիճակների պետական ծառայությանը մի քանի օր անհրաժեշտ կլինի: Բուն հրդեհը մարվել է: Այս մասին Ուկրաինայի նախագահ Վլադիմիր Զելենսկուն հաղորդել է Արտակարգ իրավիճակների պետական ծառայության պետ Նիկոլայ Չեչոտկինը, տեղեկանում ենք Ուկրաինայի նախագահի պաշտոնական կայքից։
Նշվում է, որ Զելենսկին թեմայի վերաբերյալ ամեն օր զեկույց է ստանում՝ իրավիճակը վերահսկողության տակ պահելու համար:
Արտակարգ իրավիճակների պետական ծառայության պետը հայտնել է, որ նախօրեին իրավիճակն ուժեղ քամու պատճառով վատթարացել է, ինչը հրդեհը դժվար վերահսկելի է դարձրել: Այդ իսկ պատճառով ավելի շատ սարքավորումներ և անձնակազմ է ուղարկվել՝ հրդեհը վերացնելու համար:
Նիկոլայ Չեչոտկինի խոսքով՝ տարածքում տեղացած անձրևը հրշեջներին թույլ է տվել ավելի արագ հաղթահարել ստեղծված իրավիճակը։ Նրա տեղեկացմամբ՝ հրդեհի մարման աշխատանքներին մասնակցել է 227 հրշեջ ինքնաթիռ և օգտագործվել է 500 տոննա ջուր։
Չեչոտկինը նաև հայտնել է, որ ատոմակայանի մեկուսացման գոտում ճառագայթային ֆոնը նորմայի մեջ է և չի բարձրանում։ Բացի այդ՝ հրդեհաշիջման հետևանքով կրակը չի ներթափանցել զինամթերքի պահեստներ, Չեռնոբիլի ատոմակայանի բաշխիչ կայան կամ ռադիոակտիվ թափոնների պահեստարան։
Նշենք, որ երեկ Ուկրաինայի պետական գործակալությանն առընթեր կից հանրային խորհրդի անդամ Յարոսլավ Եմելյանենկոն ֆեյսբուքյան գրառմամբ տեղեկացրել էր, որ Չեռնոբիլի ատոմակայանի մեկուսացման գոտում մոլեգնող հրդեհը մոտեցել է ռադիոակտիվ թափոնների պահեստներին: Եմելյանենկոյի խոսքով՝ կրակը շարժվում էր դեպի Չեռնոբիլի ատոմակայան, քանի որ քամին այդ կողմ էր փչում:
Հիշեցնենք՝ Չեռնոբիլի ատոմակայանի պայթյունը տեղի է ունեցել 1986 թվականի ապրիլի 26-ին։ Դա հետևանքով ահռելի քանակությամբ ճառագայթող նյութեր են արտանետվել շրջակա միջավայր: Այսօր էլ ատոմակայանի շուրջ 30 կիլոմետր շառավղով արգելված գոտի է։
Նելլի Մելքոնյան
