Արցախում կորոնավիրուսով վարակված քաղաքացին Արտաշատից է եկել. նրա հետ 17 հոգի է շփվել. ԱՀ պետնախարար

Արցախում կորոնավիրուսի հաստատված դեպքով քաղաքացին 63 տարեկան է։ Նա բուժում կստանա Երևանում։ Այս մասին այսօր Ստեփանակերտում հրավիրված ասուլիսի ժամանակ հայտարարեց Արցախի պետնախարար Գրիգորի Մարտիրոսյանը։

Նա նշեց, որ քաղաքացին մարտի 30-ին եկել է Արտաշատից, որտեղ բնակվող նրա ընտանիքի անդամների մոտ ևս հաստատվել է կորոնավիրուսի առկայությունը։

«Տեղեկություն է ստացվել, որ այն անձինք, ովքեր ապրում են Արտաշատի շրջանում, նրանց մոտ կա վարակման կասկած: Արտաշատից եկած տվյալ անձը Արցախի Առողջապահության նախարարության կողմից ապրիլի 2-ին մեկուսացվել է Քաշաթաղի շրջանային բուժմիավորումում և պահվել հսկողության տակ։ Վարակված անձի հետ շփված անձանց թեստավորումը կատարվում է մեկուսացման 13-րդ օրը, բայց քանի որ այդ անձը ախտանիշներ չի ունեցել, հսկողության տակ է պահվել մեկուսացված ձևով, մինչև մենք կարողանանք 13-րդ օրը թեստավորել»,- ասաց Մարտիրոսյանը։

Պետնախարարի խոսքով՝ հաշվի առնելով, որ նրա ընտանիքի անդամների շրջանում արդեն հաստատվել է վարակվածության դեպքը, առողջապահության համակարգն օպերատիվ է գործել. «Ապրիլի 6-ին թեստավորել են, ուղարկել են Հայաստան՝  համապատասխան լաբորատորիա, և այսօր ստացվել է տվյալ անձի թեստի դրական արդյունքը»:

Գրիգորի Մարտիրոսյանը նշեց, որ նախապես հայտնի է եղել քաղաքացու հետ շփում ունեցողների շրջանակը:

«Նրանք 17 հոգի են։ Այդ անձինք ևս ինքնամեկուսացված են»,- տեղեկացրեց պաշտոնյան՝ նշելով, որ խոսքը մարտի 30-ից ապրիլի 2-ը տեղի ունեցած շփումների մասին է, քանի որ քաղաքացին ապրիլի 2-ից մեկուսացված է:

Արցախի առողջապահության նախարար Արայիկ Բաղրյանն էլ հավելեց, որ մինչ այսօր Արցախում կորոնավիրուսի 34 թեստավորում է իրականացվել։ Նախարարը նշեց, որ քաղաքացին, որի մոտ հաստատվել է կորոնավիրուսը, ուղեկցող հիվանդություններ չունի:

Անժելա Պողոսյան