10.08.2026 | 17:49
Թուրքիայի հայոց պատրիարքությունը զորակցություն է հայտնել Գարեգին Բ-ին և եպիսկոպոսներին
Ավինյանի գրասենյակից պնդում են՝ նա signal հավելվածում գրանցվել է 2019-ին
06.04.2020 | 16:32
Փոխվարչապետ Տիգրան Ավինյանի գրասենյակը, արձագանքելով «Զանգերը վերահսկող օրենքի ընդունումից առաջ պարետ Տիգրան Ավինյանի հեռախոսահամարը գրանցվել է «Սիգնալ» հավելվածում» վերնագրով Factor.am-ի հրապարակմանը, խմբագրության էլեկտրոնային փոստին է ուղարկել պարզաբանում, որում ասված է, որ մեր հրապարակման մեջ առկա է իրականությանը չհամապատասխանող տեղեկատվություն։ Եվ որպես դրա հիմնավորում նշված է մեկ նախադասություն․ «Պարզաբանում ենք, որ Տիգրան Ավինյանը «Սիգնալ» հավելվածում գրանցվել է 2019-ին»։
Որևէ այլ փաստ, հիմնավորում ներկայացված չէ, մինչդեռ մեր հրապարակման մեջ մենք ներկայացրել էինք նշված հավելվածին Ավինյանի հեռախոսահամարի միանալու մասին փաստող արտանկարը՝ սքրինշոթը։
Ամեն դեպքում, վստահելով երկրի փոխվարչապետի գրասենյակի հավաստիացմանը, մենք խորհրդակցել ենք մի քանի մասնագետների հետ, այդ թվում և՝ արտերկրի, որոնք նշել են, որ այդ հավելվածից դուրս գալու և վերստին միանալու դեպքում հնարավոր է, որ գա նոր ծանուցում։ Ասել է թե՝ հեռախոսահամարը կարող է գրանցված լինել վաղուց, սակայն հավելվածը ջնջելու և կրկին մուտք գործելու դեպքում այն նոր ծանուցում կարող է ուղարկել։
Թե կոնկրետ այս դեպքում ինչն է եղել պատճառը, որ հավելվածին միանալու ծանուցումը եկել է մարտի 24-ի ամսաթվով, մեզ խորհրդատվություն տրամադրած մասնագետները դժվարացան միանշանակ ասել։
