Քաղաքականություն
04.04.2020 | 18:41
Մոսկվայի իշխանություններն առաջին անգամ կօգտագործեն հատուկ հավելված՝ ստուգելու համար կորոնավիրուսով վարակված քաղաքացիների գտնվելու վայրը։ Այս մասին հայտնում է ՌԲԿ-ն՝ վկայակոչելով Մոսկվայի տեղեկատվական տեխնոլոգիաների դեպարտամենտի ղեկավար Էդուարդ Լիսենյոկին։
Աղբյուրի փոխանցմամբ՝ կորոնավիրուսով վարակված քաղաքացիներից մի քանիսին արդեն սմարթֆոններ են տրվել, որոնցում տեղադրված է «Սոցիալական մոնիթորինգ» անվանումով հատուկ հավելվածը։ Նշվում է, որ այդ սմաթֆոններ չի կարելի այլ հավելվածներ ներբեռնել կամ դրանք օգտագործել զանգեր կատարելու համար։
Էդուարդ Լիսենկոյի խոսքով՝ սա իշխանություններին թույլ կտա անմիջապես ստանալ տեղեկատվություն այն մասին՝ արդյո՞ք կորոնավիրուսով հիվանդ քաղաքացին, որը պետք է պարտադիր մեկուսացման մեջ գտնվի, խախտել է կարանտինը։ Այդ դեպքում Մոսկվայի օպերատիվ շտաբը քաղաքացուն կհոսպիտալացնի։
Հավելվածը պարբերաբար պահանջելու է նաև լուսանկարներ, որպեսզի դրանց միջոցով ևս պարզի հիվանդների գտնվելու վայրը։
Հավելենք, որ Հայաստանում էլ օրեր առաջ ընդունվեց նոր օրենքի նախագիծ, ըստ որի՝ պետության կողմից հնարավոր կլինի հետևել, թե քաղաքացիներն ում են զանգահարել, երբ, որտեղից, քանի անգամ և որքան է տևել զրույցը։ Նշվում է, որ հաղորդագրությունների կամ զանգերի բովանդակությունը չի վերահսկվի։ Օրենքն ուղղված է վարակված անձի շփման շրջանակն ավելի հեշտ պարզելուն։
Նելլի Մելքոնյան
