Քաղաքականություն
29.03.2020 | 21:16
ՌԴ մայրաքաղաք Մոսկվայում կորոնավիրուսով վարակվածների թիվն անցել է 1.000-ը, այս մասին հայտարարել է Մոսկվայի քաղաքապետ Սերգեյ Սոբյանինը՝ մոսկվացիներին կոչ անելով հետևել իշխանությունների հորդորներին ու մնալ տանը։
Ռուսաստանի առողջապահության նախարարությունը տեղեկացնում է, որ վերջին օրերին կորոնավիրուս է ախտորոշվել 270 քաղաքացու մոտ, վարակվածների ընդհանուր թիվն անցնում է 1534-ից, 8 մարդ մահացել է, 64-ը՝ առողջացել։ Սոբյանինի խոսքով՝ մոսկվացիների մեծ մասը պահպանում է կանոնները և տնից դուրս չի գալիս, մետրոյում ուղևորափոխադրումները նվազել են երեք անգամ, ցամաքային տրանսպորտով ուղևորափոխադրումները՝ կրկնակի չափով, այդուհանդերձ, 52 հազար մարդ շաբաթ օրը այցելել է Մոսկվայի այգիներ, ինչը, ըստ Մոսկվայի քաղաքային իշխանությունների, մի քանի անգամ պակաս է սովորական օրերից, գրում է BBC-ի ռուսական ծառայությունը։
Ռուս Ուղղափառ եկեղեցու առաջնորդ Պատրիարք Կիրիլը կորոնավիրուսի տարածումը կանխելու նպատակով հավատացյալներին կոչ է արել չայցելել եկեղեցիներ և աղոթել տանը։ Ռուսական եկեղեցու առաջնորդը զգուշացրել է հավատացյալներին՝ քանի դեռ չկա իր օրհնությունը, առաջիկա շաբաթվա ընթացքում չայցելել եկեղեցիներ։
Իսկ Սանկտ Պետերբուրգում եկեղեցիների դռները բաց են հավատացյյալների առաջ, չնայած քաղաքային իշխանությունների արգելքին՝ ուղղված աշխարհիկ անձանց զերծ մնալ եկեղեցի այցելությունից: Հետաքրքիր է՝ ռուս ուղղափառների մուտքը եկեղեցիներ Սանկտ Պետերբուրգի քաղաքային իշխանության կողմից արգելելու որոշումը Ուղղափառ եկեղեցու Պետերբուրգի թեմը ոչ օրինական է համարել և չի փակել եկեղեցիների դռները։
Երեկ՝ շաբաթ օրը, գրանցվել է Մոսկվայից դուրս կորոնավիրուսով վարակված անձի առաջին մահը։ Նա Օրենբուրգի շրջանում բնակվող 57-ամյա կին էր, մյուս մահը գրանցվել է Սանկտ Պետերբուրգում։
