17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Արցախի նախագահի թեկնածուներն այսօր ուղիղ եթերում կբանավիճեն
Քաղաքականություն
29.03.2020 | 18:44
Այսօր վերջին օրն է, որ Արցախի նախագահի թեկնածուներն ու կուսակցությունները կկարողանան քարոզարշավ անցկացնել. վաղը լռության օր է, իսկ մարտի 31-ին արցախցիները 14 թեկնածուից կընտրեն նախագահ, ինչպես նաև 12 քաղաքական ուժերից կձևավորեն նոր խորհրդարան։
Այսօր երեկոյան 22:00-ին Արցախի Հանրային հեռուստատեսության ուղիղ եթերում կբանավիճեն նախագահի թեկնածուները։ Սա օրենքի պահանջն է պետական հեռուստաընկերությանը: Թեկնածուներից բանավեճի հրավերը մերժել է «Նոր Արցախ» դաշինքի ղեկավար, նախագահի թեկնածու Մասիս Մայիլյանը: Նա պարզաբանել է, որ հեռուստաբանավեճի առաջարկվող ձևաչափը չի կարող արդյունավետ լինել և հազիվ թե նպաստի թեկնածուների դավանած սկզբունքների ու ծրագրային դրույթների՝ առավել հանրայնացմանը:
«Բարեփոխումների մեր հայեցակարգն այս դժվարին պայմաններում հնարավորինս ներկայացվել է ընտրողներին, հուսով եմ՝ նույնը հասցրել են անել մյուս թեկնածուները։ Ինքս հարցեր չունեմ մյուս թեկնածուներին և հուսով եմ, որ նախընտրական քարոզարշավի ընթացքում ժողովուրդը բոլոր թեկնածուներից կարողացել է ստանալ իրեն հուզող հարցերի պատասխանները»,- հայտարարել է Մասիս Մայիլյանը։
Արցախի Հանրային հեռուստաընկերության եթերում բանավեճը կտևի 90 րոպե, և բացառիկ դեպքում ընդամենը 5 րոպե հնարավոր կլինի ավելացնել։ Բանավեճը բաղկացած է լինելու երեք փուլից. ներածական խոսքին կհաջորդի բուն բանավեճը՝ երկուական հարց տալու իրավունքով թեկնածուներից յուրաքանչյուրին։ Իսկ բանավեճը կեզրափակվի ժողովրդին ուղղված ուղերձներով։
Նախկինում Արցախի Հանրային հեռուստատեսությունը երբեք նման ձևաչափով բանավեճ չի կազմակերպել։ Հեռուստաընկերության գործադիր տնօրեն Մերի Դավթյանն ասել է, որ տեխնիկական դժվարություների են հանդիպել, որոնք, սակայն, հարթվել են:
«Մեր տաղավարային պայմաններում է այն իրականացվելու, պետք է խնդրենք, որ թեկնածուների ընտրազանգվածն ու հեռուստադիտողները շատ խիստ չդատեն, քանի որ մեր ստուդիան հարմարեցված չէ նման հեռուստանախագիծ իրականացնելու համար, բայց անելու ենք ավելին»,- ասել է նա։
Տեղեկացնենք նաև, որ Արցախի նախագահի թեկնածուների մասնակցությամբ հեռուստաբանավեճին ուղիղ եթերում հնարավոր է հետևել նաև Factor TV-ի Facebook-ի էջում և Youtube-ի ալիքում։
Ռոբերտ Անանյան
