Քաղաքականություն
25.03.2020 | 13:00Արդարադատության նախարար Ռուստամ Բադասյանը համաձայն չէ «Իմ քայլը» խմբակցության պատգամավոր Նիկոլայ Բաղդասարյանի այն մտքի հետ, որ «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին նախագիծը իդեալական չէ։ Այս մասին նա հայտարարեց Ազգային ժողովի այսօրվա նիստում օրինագծերի փաթեթի երկրորդ ընթերցմամբ քննարկման ժամանակ։
«Համաձայն եմ այն մտքի հետ, որ իդեալական օրենքներ չեն լինում, որովհետև դրանք պրակտիկայում մշտապես ենթակա են փոփոխման։ Բայց համաձայն չեմ Բաղդասարյանի հետ, որ այս օրենքը իդեալական չէ։ Քանի դեռ իրավակիրառ պրակտիկան որևէ խնդիր չի արձանագրել, այս օրենքը իդեալական է։ Դուք բոլորդ հնարավորություն եք ունեցել այս օրենքի ոչ իդեալական լինելու մասին կարծիք արտահայտել և ներկայացնել փաստարկներ, և էդպիսին չի լսվել, որ որևէ խնդրահարույց կետ կա այս փաթեթում»,- նշեց նախարարը։
Անդրադառնալով «Լուսավոր Հայաստան» խմբակցության պատգամավոր Տարոն Սիմոնյանի կարծիքին, թե տպավորություն է, որ օրինագիծը «թռչնակի համար» է ընդունվում, նախարարն ասաց. «Էդ ո՞նց է՝ ոչ մեկը չի նկատում, որ թռչնակ դնելու համար են անում, միայն Դուք եք նկատում, միջազգային կազմակերպությունները, ոչ մեկը չի նկատում, Դուք նկատում եք։ Ինձ մոտ տպավորություն է, որ Ձեր ելույթներն են էդպիսին, կապ չունի՝ ինչ օրինագիծ ենք քննարկում, Դուք նույն բանն եք ասում»։
Մանրամասները՝ տեսանյութում:
