14.12.2025 | 10:10
Ահազանգեր են ստացվել տապալված ծառերի, սյուների, ինչպես նաև պոկված կառուցատարրերի վերաբերյալ․ ՆԳՆ
Մեր ժողովուրդը սովորական օրերին նվնվում է, կրիտիկական պահերին՝ ծիծաղում. դա է մեզ փրկել. Լալա Մնացականյան
20.03.2020 | 21:30
«Ժողովուրդն այս օրերին զգում է, որ պետություն կա կանգնած իր մեջքին: Ես չեմ ասում, որ ամեն բան իդեալական է արվում. բնական է, կլինեն թերացումներ, սակայն ես ինքս ինձ իմ երկրում ապահով եմ զգում»,- Factor.am-ի հետ զրույցում նման տեսակետ հայտնեց Հայաստանի վաստակավոր արտիստ Լալա Մնացականյանը:
Դերասանուհու համոզմամբ՝ խուճապն ու վախն այս օրերին չեն կարող մեզ համար լավ ընկեր լինել: Նա հիշեցրեց՝ մենք ժամանակին տեսել ենք թռչնի, խոզի գրիպ, սակայն հաղթահարել ենք այդ հիվանդությունները:
Տիկին Մնացականյանը նկատեց՝ մեր ժողովուրդը դժվարին օրերին միաբանվելու իրեն բնորոշ հատկություն ունի. «Մեր ժողովուրդը սովորական օրերին նվնվում է, կրիտիկական պահերին՝ ծիծաղում. դա է մեզ փրկել: Անգամ ամենաբարդ իրավիճակներում պետք չէ կորցնել հումորի զգացումը: Դա օգնում է ոտքի կանգնել: Վստահ եմ, որ մենք պատվով կհաղթահարենք այս փորձությունը»:
Ի դեպ, դերասանուհին, որը դասավանդում է Երևանի թատրոնի և կինոյի պետական ինստիտուտում, շուտով կանցնի հեռավար ուսուցման, թեպետ, ինչպես ինքն է ասում, դժվար է առցանց խաղալ: «Ամեն դեպքում, մենք պետք է այս իրավիճակին ոչ թե որպես դժվարություն նայենք, այլ՝ հնարավորություն: Ինքս միշտ այդպես եմ մտածում»,- եզրափակեց մեր զրուցակիցը:
Հիշեցնենք, Հայաստանում մարտի 20-ին՝ ժամը 10:00-ի դրությամբ նոր կորոնավիրուսով վարակվելու 136 դեպք է գրանցվել:
Աննա Բաբաջանյան
