30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
ԵԽԽՎ զեկուցողն Ադրբեջանի իշխանություններին կոչ է արել կատարել ԵԽ անդամի պարտավորությունները
Քաղաքականություն
19.03.2020 | 19:24
Ադրբեջանի քաղբանտարկյալների հարցերով ԵԽԽՎ զեկուցող Սուննա Էվարսդոտիրը ողջունել է Ադրբեջանի իշխանությունների կողմից հետաքննող լրագրող Աֆղան Մուխթարլիի ազատ արձակումը։
«Շատ հաճելի է լսել, որ պարոն Մուխթարլիի ծանր փորձություններն ավարտվեցին, և նա միացավ իր ընտանիքին: Վեհաժողովն արդեն Մուխթարլիին քաղբանտարկյալ է ճանաչել։ Ադրբեջանի իշխանությունները, որպես Եվրոպայի Խորհրդի անդամ և մարդու իրավունքների մասին եվրոպական կոնվենցիայի կողմ, պետք է վճռորոշ գործողություններ ձեռնարկեն՝ իրենց երկրի պարտավորությունները կատարելու համար, ազատ արձակելով մյուս բոլոր քաղբանտարկյալներին և լուծելով համակարգային հիմնախնդիրները։ Նրանք պետք է անհապաղ կատարեն ՄԻԵԴ-ի համապատասխան որոշումների բոլոր կետերն ու սկսեն ԵԽԽՎ-ի հետ կառուցողական աշխատանքը»,- հայտարարել է զեկուցողը:
ԵԱՀԿ մամուլի ազատության հարցերով ներկայացուցիչ Հարլեմ Դեզիրը նունպես ողջունել է Աֆղան Մուխթարլիի ազատ արձակումը: «Ողջունում եմ ադրբեջանցի լրագրող Աֆղան Մուխթարլիի երկար սպասված ազատ արձակումը։ Նրա գործով ես բազմիցս դիմել եմ Ադրբեջանի իշխանություններին՝ իմ խորին մտահոգությունը հայտնելով նրա վիճակի վերաբերյալ և կոչ անելով չեղարկել քրեական մեղադրանքներն ու ազատ արձակել նրան: Այժմ ես հանգիստ եմ, որ նա կարող է միանալ Գերմանիայում գտնվող իր ընտանիքին․ կնոջը՝ Լեյլա Մուստաֆաևային և դստերը»,- հավելել է Դեզիրը:
Նշենք, որ անկախ հետաքննող լրագրող Աֆղան Մուխթարլին առևանգվել էր 2017-ի մայիսին՝ Վրաստանի մայրաքաղաք Թբիլիսիում և բերվել Բաքու: Նա դատապարտվել էր «մաքսանենգության», «սահմանի ապօրինի հատման» և «պաշտոնական ներկայացուցչին հակառակվելու» համար:
Նելլի Մելքոնյան
