Տնտեսություն
19.03.2020 | 11:29Կապված ճգնաժամային վիճակի հետ՝ բիզնեսի որոշ ոլորտներ կունենան ֆինանսական բարդություններ, մենք առաջարկում ենք ճգնաժամային վարկային պորտֆելներ բիզնեսին: Այս մասին Կառավարության այսօրվա նիստում հայտարարեց ՀՀ վարչապետ Նիկոլ Փաշինյանը:
Նա ներկայացրեց վարկային պորտֆելի էությունը. «Ֆինանսավորման 50 տոկոսն իրականացնում են առևտրային բանկերը և վարկային կազմակերպությունները, 50 տոկոսը ֆինանսավորում է Կառավարությունը: Կառավարության տվածն անտոկոս է, իսկ բանկերի տվածի տոկոսները նույնպես սուբսիդավորում է Կառավարությունը: Այսինքն՝ տնտեսվարողը զրո տոկոսով ստանում է վարկային միջոցներ»:
Նա նաև ներկայացրեց, թե որոնք են այդ վարկերի նկատմամբ հիմնական պահանջները:
«Պետք է վարկը լինի դրամով, բանկի կողմից տրվող մասը կարող է լինել արտարժույթով: Ժամկետը լինելու է մինչև 24 ամիս: Վարկի առավելագույն գումարը 500 մլն դրամ է: Վարկային միջոցները կարելի է օգտագործել միայն անկանխիկ և բանկային փոխանցումներով: Առավելագույն ինտեգրալ տոկոսը տարեկան 0-6 տոկոս: Կառավարության կողմից համաֆինանսավորում առաջարկվում է հետևյալ չափով. աշխատավարձի պարագայում՝ մինչև 50 տոկոս, հումքի պարագայում՝ 40 տոկոս, սարքավորումների պարագայում՝ 25 տոկոս, կոմունալ ծախսերի դեպքում՝ 45 տոկոս, սննդի ներմուծման պարագայում՝ 30 տոկոս, գյուղատնտեսության պարագայում՝ 35 տոկոս»,- թվարկեց վարչապետը:
Փաշինյանը հավելեց, որ այս առաջարկությունն առաջիկա 1-2 օրվա ընթացքում հանրային քննարկում կանցնի, և երբ պատրաստ լինի, Կառավարությունն այն կհաստատի:
Մանրամասները՝ տեսանյութում:
