13.12.2024 | 18:50
Ուկրաինայի ինը էներգաբլոկներից հինգը կրճատել է հզորությունը ռուսական հարվածներից հետո. ՄԱԳԱՏԷ
Մոսկվայի փոխքաղաքապետը հերքել է ՌԴ մայրաքաղաքը կարանտինային գոտու վերածելու լուրը
Քաղաքականություն
17.03.2020 | 19:09
ՌԴ-ում կորոնավիրուսի հետ կապված իրադրության վերահսկողության օպերատիվ շտաբը հերքել է լուրերն այն մասին, որ Մոսկվան կարանտինային գոտու կվերածվի, գրում է «Վեդոմոստին»:
«Տեղեկությունները կեղծ են: Խնդրում եմ առաջնորդվել օպերատիվ շտաբի պաշտոնական հաղորդագրություններով»,- հայտնել է Մոսկվայի փոխքաղաքապետ, մայրաքաղաքային օպերատիվ շտաբի ղեկավար Անաստասիա Ռակովան:
Ավելի վաղ «Վեդոմոստին» լուր էր հրապարակել այն մասին, որ Մոսկվայում, հնարավոր է, առաջիկայում արտակարգ դրության ռեժիմ սահմանվի և դադարեցվի հանրային տրանսպորտի, այդ թվում՝ մետրոյի աշխատանքը, իսկ քաղաքը փակվի մուտքի համար: Մայրաքաղաքային իշխանությունների նման մտադրության մասին պարբերականին հայտնել էին քաղաքապետարանի և դաշնային կառավարության աղբյուրները:
Միաժամանակ, արդեն պաշտոնապես հայտնի է որոշ սահմանափակումների մասին՝ պայմանավորված կորոնավիրուսի տարածման սպառնալիքի հետ:
Մոսկվայի քաղաքապետ Սերգեյ Սոբյանինը մինչև ապրիլի 10-ը ցանկացած փողոցային զանգվածային միջոցառման անցկացման արգելք է սահմանել, իսկ փակ տարածքներում կազմակերպվող միջոցառումների մասնակիցների թիվը չպետք է գերազանցի 50-ը: Մարտի 21-ից էլ փակվելու են բոլոր պետական հանրակրթական դպրոցները, մարզադպրոցներն ու նախակրթական հաստատությունները:
Բացի այդ, մոսկովյան իշխանություններն ԱՄՆ-ից, Մեծ Բրիտանիայից, Ուկրաինայից, Բելառուսից և եվրոպական երկրներից ժամանողներին հորդորում են 14 օր ինքնամեկուսանալ:
