21.06.2026 | 16:29
Հայաստանի բասկետբոլի կանանց ընտրանին սկսում է պայքարը փոքր երկրների Եվրոպայի առաջնությունում
Հռոմի Պապը շրջում է Հռոմի դատարկ փողոցներով և աղոթում կորոնավիրուսից բուժման համար
Քաղաքականություն
16.03.2020 | 13:07
Հռոմի Պապ Ֆրանցիսկոսը կիրակի օրը կարճ ժամանակով լքել է Վատիկանի իր նստավայրն ու այցելել Հռոմ, որպեսզի աղոթի կորոնավիրուսից մարդկանց բուժման համար։
Կորոնավիրուսը Իտալիայում խլել է մեկուկես հազար մարդու կյանք։ Սուրբ Աթոռի մամուլի ծառայությունը հայտնում է, որ կաթոլիկ քրիստոնյաների առաջնորդը նախ այցելել է Սանտա Մարիա Մաջորե բազիլիկ եկեղեցի և աղոթել Աստվածամոր սրբապատկերի առաջ։ Հետո Հովվապետը ոտքով քայլել է Սան Մարսելո Ալ Կորսո բազիլիկ եկեղեցի։ Այնտեղ պահպանվում է այն խաչը, որի առաջ Հռոմի բնակիչները աղոթել են 16-րդ դարում՝ ժանտախտի համաճարակի օրերին։
BBC-ի հաղորդմամբ, Պապը թիկնազորի ուղեկցությամբ շրջել է Հռոմի փողոցներով, և տարածված նկարից երևում է, որ փողոցներում սակավաթիվ են մարդիկ։ Ամբողջ Իտալիայի տարածքում կարանտին է հայտարարված, ինչի հետևանքով բազմաթիվ քաղաքներ, այդ թվում՝ մայրաքաղաքը, գրեթե դատարկ են։
«Ֆրանցիսկոս Պապն աղոթել է հիվանդների բուժման ու պանդեմիայի ավարտի համար, որը համակել է ողջ Իտալիան և աշխարհը։ Նա հիշատակել է վերջին օրերի զոհերին ու խնդրել, որ նրանց ընտանիքները հանգստություն գտնեն»,- հաղորդում է մամուլի ծառայությունը։ Կորոնավիրուսի վարակման դեպքեր արձանագրվել են եվրոպական 5 տասնյակ երկրներում։
