Հասարակություն
11.03.2020 | 15:39
Այսօր Գյումրիում հուղարկավորել են մարտի 5-ին դաժան ծեծի հետևանքով մահացած 43-ամյա կնոջը։ Հուղարկավորությունը տեղի է ունեցել Շիրակ գյուղի գերեզմանատանը, իր ծնողների կողքին։ Այս մասին մեզ հետ զրույցում հայտնեցին Գյումրու քաղաքապետարանից։
Հարազատներից ոչ ոք այդպես էլ չի մասնակցել հուղարկավորությանը։ Այն կազմակերպել է Գյումրու քաղաքապետարանը։ Հուղարկավորությանը մասնակցել են քաղաքային ու մարզային իշխանության ներկայացուցիչները, քաղաքապետ Սամվել Բալասանյանի ու մարզպետ Տիգրան Պետրոսյանի գլխավորությամբ։
Ներկա են եղել նաև ԱԺ փոխխոսնակ Լենա Նազարյանը, վարչապետի նորանշանակ մամուլի խոսնակ Մանե Գևորգյանը։
Հիշեցնենք, որ մարտի 5-ին ժամը 15:40-ին հիվանդանոցից Գյումրիի Ոստիկանության Մուշի բաժին հաղորդում է ստացվել, որ «տրավմային շոկ, գանգուղեղային փակ վնասվածքով» Պռոշյան փողոցի տներից մեկից բուժօգնության է տեղափոխվել 13-ամյա մի աղջիկ: Դեպքի վայր մեկնած օպերատիվ խմբի ծառայողները բնակարանում հայտնաբերել են աղջկա մոր՝ 43-ամյա Մարինե Խ.-ի դին՝ բռնության հետքերով: Երեխան տեղափոխվել էր «Գյումրու մոր և մանկան ավստրիական մանկական» հիվանդանոց։
Հանցագործությունը կատարելու կասկածանքով բերման է ենթարկվել ու կալանավորվել 28-ամյա մի տղամարդ։ Նա խոստովանել է, որ ինքն է ծեծի ենթարկել 42-ամյա կնոջը և նրա անչափահաս դստերը: Ըստ տեղեկությունների՝ տղամարդը եղել է մահացած կնոջ ընկերը, կենցաղային հողի վրա էլ դաժան ծեծի է ենթարկել կնոջն ու երեխային: Արդյունքում կինը մահացել է, աղջիկը՝ ծանր վնասվածքներ ստացել: Դեպքի առթիվ 2020 թվականի մարտի 5-ին Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 2-րդ մասի 1-ին (երկու կամ ավելի անձանց նկատմամբ) և 14-րդ (անզգուշությամբ առաջացնելով տուժողի մահ) կետերով։
